മനുഷ്യനോട് കൂറുപുലർത്തുന്ന മൃഗങ്ങളിലൊന്നാണ് നായ. യജമാനോടുള്ള ആത്മാർത്ഥയും സ്നേഹവും കാണിക്കാൻ നായ എന്ന മൃഗം എപ്പോഴും മുൻപന്തിയിലാണ്. ഇത്തരത്തിൽ തന്റെ ഉടമയുടെ ജീവൻ രക്ഷിക്കാൻ ശ്രമിക്കുന്നതിനിടെ പരിക്കേറ്റ് അവശയായ നായയാണ് സമൂഹമാദ്ധ്യമങ്ങളിൽ ചർച്ചയാകുന്നത്.
ട്രക്കിങ്ങിനിടെ ആക്രമിക്കാൻ വന്ന മൗണ്ടെയ്ൻ ലയണിൽ നിന്നാണ് ഈവ എന്ന രണ്ടര വയസുള്ള നായ തന്റെ ഉടമയായ യുവതിയെ രക്ഷപ്പെടുത്തിയത്. ഉത്തര കാലിഫോർണിയയിലാണ് സംഭവം.
പ്യൂമ, പാന്തർ എന്നെല്ലാം അറിയപ്പെടുന്ന പൂച്ചയുടെ വർഗത്തിൽപ്പെടുന്ന മൃഗമാണ് മൗണ്ടെയ്ൻ ലയൺ. ട്രക്കിങ്ങിന് പോയ 24കാരിയായ എറിൻ വിൽസണെയാണ് പ്യൂമ ആക്രമിച്ചത്. വിൽസണിന്റെ തോളിലേക്ക് ചാടിയ പ്യൂമ ജാക്കറ്റിൽ പിടിമുറുക്കിയതോടെ അവൾ നിലവിളിച്ച് കരഞ്ഞു. ഈവയെ ഉറക്കെ വിളിച്ചു. ഇതോടെ ഓടിയെത്തിയ ഈവ പ്യൂമയുമായി മൽപ്പിടുത്തത്തിലായി. ഇതോടെ രക്ഷപ്പെട്ട യുവതി പ്യൂമയെ കല്ലെടുത്തെറിഞ്ഞും വടികൊണ്ട് തല്ലിയും ഓടിക്കാൻ ശ്രമിച്ചെങ്കിലും നടന്നില്ല. ഒടുവിൽ തന്റെ ബാഗിൽ നിന്നും പെപ്പർ സ്പ്രേ എടുത്ത യുവതി പ്യൂമയുടെ മുഖത്തേക്ക് അടിച്ചു. ഇതോടെ ഈവയുടെ പിടിവിട്ട് പ്യൂമ ഓടി രക്ഷപ്പെട്ടു.
പരിക്കേറ്റ് അവശയായ ഈവയെ ഉടൻ ആശുപത്രിയിലെത്തിക്കുകയും ചെയ്തു. ഈവയുടെ തലയ്ക്കും കൈകളിലും പരിക്കേറ്റിരുന്നു. നിലവിൽ ഈവയുടെ ആരോഗ്യനില തൃപ്തികരമാണെന്ന് വിൽസൺ ട്വിറ്ററിലൂടെ അറിയിച്ചു. യജമാനത്തിയെ രക്ഷിച്ച ഈവ ഇപ്പോൾ ട്വിറ്ററിൽ തരംഗമാണ്.
This is Eva. She saved her human from a mountain lion. It pounced at them while they were hiking, and Eva fought it off. She’s spent a few days in the hospital, but is expected to make a full recovery and return home tonight. We are proud to award her our highest honor… 15/10 pic.twitter.com/2yA4KntIkZ
— WeRateDogs® (@dog_rates) May 19, 2022
പൊതുവെ പ്യൂമകൾ മനുഷ്യരെ ആക്രമിക്കാറില്ല. വളരെ അപൂർവ്വമായി മാത്രമാണ് പ്യൂമകളുടെ ആക്രമണം റിപ്പോർട്ട് ചെയ്തിട്ടുള്ളത്. ഇത്തരം ആക്രമണങ്ങളിൽ നിന്ന് മനുഷ്യർ രക്ഷപ്പെടുന്നതും വിരളമാണ്.
