മുംബൈ : മഹാരാഷ്ട്രയിൽ പെട്രോളിനും ഡീസലിനും വിലകുറച്ച് ഏക്നാഥ് ഷിൻഡെ സർക്കാർ. പെട്രോളിന് അഞ്ച് രൂപയും ഡീസലിന് മൂന്ന് രൂപയുമാണ് കുറച്ചത്. പുതിയ സർക്കാരിന്റെ രണ്ടാം മന്ത്രിസഭാ യോഗത്തിലാണ് നിർണായക തീരുമാനം.
പെട്രോളിന്റെയും ഡീസലിന്റെയും മൂല്യവർദ്ധിത നികുതിയിൽ യഥാക്രമം അഞ്ച് രൂപയും രണ്ട് രൂപയും കുറച്ചതായി മുഖ്യമന്ത്രി ഏക്നാഥ് ഷിൻഡെയാണ് അറിയിച്ചത്. ഈ തീരുമാനത്തെ ബിജെപി നേതാവും മഹാരാഷ്ട്ര ഉപമുഖ്യമന്ത്രിയുമായ ദേവേന്ദ്ര ഫഡ്നാവിസ് സ്വാഗതം ചെയ്തു.
മഹാരാഷ്ട്രയിലെ ജനങ്ങൾക്ക് ഇത് കൂടുതൽ ആശ്വാസമേകുമെന്ന് അദ്ദേഹം ട്വിറ്ററിൽ കുറിച്ചു. ഈ തീരുമാനത്തെ തുടർന്ന് 6,000 കോടിയുടെ ബാദ്ധ്യതയാണ് സംസ്ഥാനത്തിന് ഉണ്ടാവുക. സാധാരണ ജനങ്ങളെ സഹായിക്കണമെന്ന പ്രധാനമന്ത്രി നരേന്ദ്ര മോദിയുടെ ആവശ്യത്തെ തുടർന്നാണ് തീരുമാനമെന്നും അദ്ദേഹം വ്യക്തമാക്കി.
