ബെയ്ജിങ്: കൃത്യസമയത്തെ ഇടപെടൽ മൂലം ഒരു ജീവൻ രക്ഷിക്കുക എന്നത് ചെറിയ കാര്യമല്ല. ഇത്തരത്തിൽ, ഒരു യുവാവിന്റെ സമയോചിതമായ ഇടപെടൽ മൂലം ഒരു കൊച്ചുപെൺകുട്ടിയുടെ ജീവൻ രക്ഷിക്കുന്ന ദൃശ്യങ്ങളാണ് ഇപ്പോൾ സമൂഹമാദ്ധ്യമങ്ങളിൽ തരംഗമാകുന്നത്.
കെട്ടിടത്തിന്റെ അഞ്ചാം നിലയിൽ നിന്നും വീണ പെൺകുട്ടിയെ യുവാവ് രക്ഷിക്കുന്നതാണ് ദൃശ്യങ്ങളിലുള്ളത്. ചൈനയിലെ ഷീജിയാംഗ് പ്രവിശ്യയിലുള്ള ടോംക്സിയാങ് മേഖലയിലാണ് സംഭവം. അപകടം നടന്ന സ്ഥലത്ത് റോഡരികിൽ വാഹനം പാർക്ക് ചെയ്യാൻ എത്തിയതായിരുന്നു ഷെൻ ഡോങ് എന്ന യുവാവ്. പെട്ടെന്നാണ് അദ്ദേഹം സമീപത്തെ കെട്ടിടത്തിന് മുകളിൽ നിന്നും ഒരു കുട്ടി വീഴാൻ പോകുന്നത് കണ്ടത്.
Heroes among us. pic.twitter.com/PumEDocVvC
— Lijian Zhao 赵立坚 (@zlj517) July 22, 2022
തന്റെ കാറിൽ നിന്നും ഓടിയെത്തിയ ഷെൻ കെട്ടടിത്തിന് താഴെ വന്ന് നിന്നു. അപ്പോഴേക്കും അഞ്ചാം നിലയിൽ നിന്ന് പെൺകുട്ടി വീണിരുന്നു. ഷെൻ ഡോങിന്റെ കൈകളിലേക്ക് കുഞ്ഞ് നേരെ വന്നുപതിച്ചു. രണ്ട് വയസുകാരിയുടെ ജീവൻ അങ്ങനെ ഡോങിന്റെ കൈകളിൽ ഭദ്രമായി. സമീപത്തെ സിസിടിവികളിൽ പതിഞ്ഞ ദൃശ്യങ്ങളിൽ സമൂഹമാദ്ധ്യമങ്ങളിൽ പങ്കുവെച്ചതോടെ ഡോങ് നാട്ടിലെ ഹീറോ ആയി മാറുകയായിരുന്നു. ചൈനീസ് സർക്കാരിന്റെ ഔദ്യോഗിക പേജിലും വീഡിയോ പങ്കുവെച്ചിട്ടുണ്ട്.
സിനിമകളിൽ മാത്രമല്ല യാഥാർത്ഥ ജീവിതത്തിലും ചില നായകൻമാരെ നമുക്ക് കാണാമെന്നാണ് വീഡിയോയ്ക്ക് താഴെ പലരും അഭിപ്രായപ്പെട്ടത്. അദ്ദേഹത്തെ സർക്കാർ ആദരിക്കണമെന്നും ചിലർ ആവശ്യപ്പെട്ടു. അതേസമയം കെട്ടിടത്തിൽ നിന്ന് വീണ കുഞ്ഞ് നിലവിൽ ആശുപത്രിയിൽ ചികിത്സയിലാണ്. വീഴ്ചയിൽ കാലുകൾക്ക് ചെറിയ പരിക്കേറ്റതൊഴിച്ചാൽ കുഞ്ഞിന്റെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു.
കൃത്യസമയത്ത് ഓടിയെത്താൻ കഴിഞ്ഞതിൽ അതിയായ സന്തോഷമുണ്ടെന്ന് ഷെൻ ഡോങ് പ്രതികരിച്ചു. പക്ഷെ എന്തൊക്കെയാണ് അപ്പോൾ നടന്നതെന്ന് ഓർത്തെടുക്കാൻ കഴിയുന്നില്ലെന്നും പെട്ടെന്നുണ്ടായ ഒരു നീക്കമായിരുന്നു അതെന്നും അദ്ദേഹം പറഞ്ഞു. ചിന്തിക്കാൻ സമയം ലഭിച്ചില്ലെന്നും ഭാഗ്യം കൊണ്ട് മാത്രമാണ് ജീവൻ രക്ഷിക്കാനായതെന്നും അദ്ദേഹം മാദ്ധ്യമങ്ങളോട് പ്രതികരിച്ചു.
