നാഗ്പൂർ: ആർഎസ്എസ് പരിപാടിയിൽ പങ്കെടുത്തതിന്റെ പേരിൽ ബിജെപി ന്യൂനപക്ഷ മോർച്ച ദേശീയ പ്രസിഡന്റ് ജമാൽ സിദ്ദിഖിക്ക് വധഭീഷണി. ഇസ്ലാമിക മതമൗലികവാദികളാണ് ഭീഷണി സന്ദേശം അയച്ചിരിക്കുന്നത്. സംഭവത്തിൽ ജമാൽ സിദ്ദിഖി പോലീസിൽ പരാതി നൽകി. നാഗ്പൂരിലുള്ള അദ്ദേഹത്തിന്റെ ഓഫീസിന്റെ വധഭീഷണി മുഴക്കുന്ന കത്തുകൾ ലഭിച്ചത്. നിങ്ങൾ ഇസ്ലാമിനെ അപകീർത്തിപ്പെടുത്തി, അതുകൊണ്ട് ശിക്ഷ അർഹിക്കുന്നു. നിങ്ങളെ കഴുത്തറുത്ത് കൊലപ്പെടുത്തുമെന്നും കത്തിൽ പറയുന്നു.
ആർഎസ്എസിന്റെ നേതൃത്വത്തിൽ സംഘടിപ്പിച്ച ഗുരു പൂജയിൽ പങ്കെടുത്തതിന് പിന്നാലെയാണ് ഇസ്ലാമിക മതമൗലികവാദികൾ ജമാൽ സിദ്ദിഖിയെ കൊല്ലുമെന്ന് ഭീഷണിപ്പെടുത്തിയത്. ആർഎസ്എസ് പരിപാടിയിൽ ജമാൽ സിദ്ദിഖി പങ്കെടുക്കുന്നതിന്റെ ചിത്രങ്ങളും കത്തിനൊപ്പം ഉണ്ടായിരുന്നു.
നാഗ്പൂരിലെ സക്കർദാര പോലീസ് സ്റ്റേഷനിലാണ് ജമാൽ സിദ്ദിഖി പരാതി നൽകിയത്. തന്റെ ജന്മനാട്ടിൽ നടന്ന ഒരു പരിപാടിയിൽ പങ്കെടുത്തതിന്റെ പേരിലാണ് മതഭ്രാന്തന്മാർ തനിക്കെതിരെ വധഭീഷണി മുഴക്കുന്നതെന്ന് അദ്ദേഹം പറഞ്ഞു. എന്നാൽ ഇത്തരം ഭീഷണികളെ ഭയക്കില്ല. രാജ്യത്തിന്റെ താത്പര്യങ്ങൾ മുൻനിർത്തി പ്രവർത്തനങ്ങൾ തുടരുമെന്നും അദ്ദേഹം പറയുന്നു.
