ചെന്നൈ: കോൺഗ്രസ് അദ്ധ്യക്ഷനായി തിരഞ്ഞെടുക്കപ്പെട്ട മല്ലികാർജുൻ ഖാർഗെയെ പരിഹസിച്ച പാർട്ടി വക്താവിനെതിരെ കടുത്ത നടപടിയുമായി ഡിഎംകെ. വക്താവ് സ്ഥാനത്ത് നിന്ന് കെഎസ് രാധാകൃഷ്ണനെ സസ്പെൻഡ് ചെയ്തു. മൻമോഹൻ സിംഗിന്റെ രണ്ടാംപതിപ്പാണ് ഖാർഗെയെന്ന ക്യാപ്ഷനോടെയാണ് ഡിഎംകെ നേതാവ് ചിത്രം പങ്കുവെച്ചത്. ഖാർഗെയ്ക്ക് മൻമോഹൻസിംഗിന്റെ തൊപ്പി ഫോട്ടോഷോപ്പ് ചെയ്ത് ചേർത്ത് വെച്ച് മൻമോഹൻസിംഗ് 2.0 എന്നാണ് രാധാകൃഷ്ണൻ ട്വീറ്റ് ചെയ്തത്.
ട്വീറ്റ് വൈറലായതിന് പിന്നാലെ ചട്ടലംഘനം നടത്തിയതിന് രാധാകൃഷ്ണനെ ചുമതലകളിൽ നിന്ന് നീക്കം ചെയ്യുകയാണെന്ന് ഡിഎംകെ ജനറൽ സെക്രട്ടറി എസ് ദുരൈമുരുകൻ അറിയിച്ചു. എസ് രാധാകൃഷ്ണന്റെ നടപടി ഡി എം കെയ്ക്ക് അപകീർത്തികരമാണ് എന്ന് ദുരൈ മുരുകൻ പറഞ്ഞു
മൻമോഹൻസിംഗ് നെഹ്റു കുടുംബത്തിന്റെ കളിപ്പാവയായ പോലെ ഖാർഗെയും ആവുമെന്ന് കാണിച്ച് പലരും ട്വീറ്റ് പങ്കുവെച്ചിരുന്നു.സംഭവം വിവാദമായതിന് പിന്നാലെ കെ എസ് രാധാകൃഷ്ണൻ ട്വീറ്റ് ഡിലീറ്റ് ചെയ്തിരുന്നു.
നേരത്തെ വിവാദ ട്വീറ്റിനെ തള്ളി കോൺഗ്രസ് രംഗത്തെത്തിയിരുന്നു. കെ എസ് രാധാകൃഷ്ണന്റെ അഭിപ്രായത്തോട് ഡി എം കെ വഴങ്ങില്ലെന്ന് കോൺഗ്രസ് നേതാക്കൾ ചൂണ്ടിക്കാട്ടിയിരുന്നു.പാർട്ടി അധ്യക്ഷൻ എം കെ സ്റ്റാലിനും എം പി കനിമൊഴിയും ഖാർഗെയുടെ വിജയത്തെ അഭിനന്ദിച്ചിരുന്നു
