കൊൽക്കത്ത: പശ്ചിമ ബംഗാളിലെ സൗത്ത് 24 പർഗനാസിൽ ക്രൂഡ് ബോംബ് ആക്രമണത്തിൽ അഞ്ച് കുട്ടികൾക്ക് പരിക്ക്. ബംഗാളിലെ നരേന്ദ്രപൂർ ഏരിയയിലാണ് ആക്രമണമുണ്ടായത്.
കളിച്ചുകൊണ്ടിരുന്ന കുട്ടികളാണ് ആക്രമിക്കപ്പെട്ടത്. ഗ്രൗണ്ടിന് അറ്റത്ത് ക്രൂഡ് ബോംബുകൾ കിടക്കുന്നത് കുട്ടികൾ കണ്ടിരുന്നു. ഇതിന് സമീപം ചിലർ നിൽക്കുന്നതും കുട്ടികൾ കാണാനിടയായി. ഇവരുടെ അടുത്തേക്ക് കുട്ടികൾ എത്തിയപ്പോൾ അക്രമി സംഘം അവരെ ഓടിക്കാൻ ക്രൂഡ് ബോംബെടുത്ത് എറിയുകയായിരുന്നു.
അടുത്തേക്ക് വരരുതെന്ന് ആവശ്യപ്പെട്ടിട്ടും കുട്ടികൾ പോകുകയും ഇതേതുടർന്ന് അക്രമികൾ രണ്ട് ബോംബുകൾ എറിഞ്ഞെന്നുമാണ് വിവരം. തുടർന്നാണ് അഞ്ച് കുട്ടികൾക്ക് പരിക്കേറ്റത്. സംഭവസ്ഥലത്തേക്ക് പോലീസ് എത്തിയപ്പോഴേക്കും പ്രതികൾ രക്ഷപ്പെട്ടിരുന്നു. അക്രമികൾക്കായി തിരച്ചിൽ പുരോഗമിക്കുകയാണെന്ന് പോലീസ് അറിയിച്ചു.
രണ്ട് ദിവസങ്ങൾക്ക് മുമ്പ് സമാനരീതിയിൽ ബോംബ് പൊട്ടിത്തെറിച്ച് ഒരു കുട്ടി കൊല്ലപ്പെടുകയും മറ്റൊരു കുട്ടിക്ക് പരിക്കേൽക്കുകയും ചെയ്തിരുന്നു. ഗ്രൗണ്ടിൽ കളിക്കുന്നതിനിടെ ബോളാണെന്ന് കരുതി കുട്ടികൾ ബോംബ് കയ്യിലെടുത്തതോടെയാണ് അപകടമുണ്ടായത്. നോർത്ത് 24 പർഗനാസിലെ കൻകിനാരാ മേഖലയിലാണ് സംഭവമുണ്ടായത്.
