ന്യൂഡൽഹി : അഹമ്മദാബാദിൽ 154 കോടി രൂപയുടെ വികസനപദ്ധതികൾ ഉദ്ഘാടനം ചെയ്ത് അമിത് ഷാ. സ്മാർട്ട് സ്കൂളുകൾ, സീനിയർ സിറ്റിസൺ പാർക്ക്, അങ്കണവാടികൾ, മേൽപ്പാലങ്ങൾ, കാൽനട സബ് വേ തുടങ്ങിയ വികസന പദ്ധതികൾക്കാണ് അംഗീകാരം നൽകിയിരിക്കുന്നത്. അഹമ്മദാബാദ് മുനിസിപ്പൽ കോർപ്പറേഷനും അഹമ്മദാബാദ് അർബൻ ഡവലപ്മെന്റ് അതോറിറ്റിയും സംയുക്തമായി ചേർന്ന് പൂർത്തിയാക്കിയ വികസനപ്രവർത്തനങ്ങളാണ് അമിത് ഷാ ഉദ്ഘാടനം ചെയ്തത്.
വീഡിയോ കോൺഫറൻസിലൂടെ പദ്ധതികൾ ഉദ്ഘാടനം ചെയ്തതിന് ശേഷം ചടങ്ങിൽ പങ്കെടുത്തവരുമായി അദ്ദേഹം സംവദിച്ചു. 154 കോടി രൂപയുടെ വിവിധ പദ്ധതികൾ നടപ്പിലാക്കിയതിന് മുഖ്യമന്ത്രി ഭൂപേന്ദ്ര പട്ടേൽ സർക്കാരിനെ അഭിനന്ദിച്ചു.
അഹമ്മദാബാദിലെ ചന്ദ്ഖേഡ, സബർമതി, ഷേല, തൽതേജ്, സർഖേജ് എന്നീ മേഖലകളിൽ 7.38 കോടി രൂപ ചെലവിൽ നിർമ്മാണം പൂർത്തീകരിച്ച സ്മാർട്ട് സ്കൂളുകളുടെ ഉദ്ഘാടന കർമ്മം അമിത് ഷാ നിർവഹിച്ചു. കൂടാതെ 62 ലക്ഷം രൂപ ചിലവിൽ നിർമിച്ച ചന്ദ്ഖേഡയിലെയും നവാദാജിലെയും സീനിയർ സിറ്റിസൺ പാർക്ക്, 40 ലക്ഷം രൂപ ചിലവിൽ അഞ്ച് അങ്കണവാടികളും 97 കോടി രൂപ ചിലവിൽ നിർമ്മിച്ച മേൽപ്പാലത്തിന്റെ ഉദ്ഘാടനവും അദ്ദേഹം നിർവഹിച്ചു.
