അമരാവതി: പുനീത് സാഗർ അഭിയാന്റെ ഭാഗമായി കടൽത്തീരങ്ങൾ ശുചിയാക്കി ഇന്ത്യൻ നാവീക സേന. യാരഡ, ആർകെ, ഭീമിലി എന്നീ കടൽത്തീരങ്ങളിലും മേഘാദ്രിപേട്ട നദി തീരത്തും നാവീകസേന ശുചീകരണപ്രവർത്തനം നടത്തി. പ്ലാസ്റ്റിക് ഉപയോഗത്തിന്റെ അപകട സാദ്ധ്യതകളെക്കുറിച്ച് തീരദേശ ജനങ്ങളിൽ അവബോധം സൃഷ്ടിക്കുകയാണ് പദ്ധതിയുടെ ലക്ഷ്യം.
ഇസ്റ്റേൺ നേവൽ കമാൻഡിന്റെ ആഭിമുഖ്യത്തിലായിരുന്നു ശുചീകരണ പ്രവർത്തനങ്ങൾ. 600-ൽ അധികം സേനാംഗങ്ങൾ ശുചിയാക്കൽ പ്രവർത്തനത്തിൽ പങ്കെടുത്തു. സർവ്വീസിൽ നിന്ന് വിരമിച്ചവരും അവരുടെ കുടുംബാംഗങ്ങളും ഇസ്റ്റേൺ നേവൽ കമാൻഡിലെ ഉദ്യോഗസ്ഥരും പ്രദേശവാസികളും ഉൾപ്പെടെയുള്ളവർ ശുചീകരണ യജ്ഞത്തിൽ പങ്കെടുത്തു. കടലോരങ്ങളിൽ നിന്ന് 700 കിലോ അജൈവമാലിന്യങ്ങളാണ് സംഘം സംഭരിച്ചത്.
കടൽത്തീരങ്ങൾ പ്ലാസ്റ്റിക്കിൽ നിന്നും മറ്റ് പാഴ്വസ്തുക്കളിൽ നിന്നും മുക്തമാക്കുന്നതിനായി എൻസിസിയുടെ നേതൃത്വത്തിൽ 2021 ഡിസംബർ ഒന്നിനാണ് പുനീത് സാഗർ അഭിയാൻ ആരംഭിച്ചത്. ഇതിന്റെ ഭാഗമായി ഇന്ത്യൻ നാവികസേനയുടെ വിവിധ യൂണിറ്റുകൾ ഓരോ മാസവും ഒരു ദിവസം തീരദേശ ശുചീകരണത്തിനായി മാറ്റിവെക്കുന്നു. പ്ലാസ്റ്റിക്കിൽ നിന്നും മറ്റ് പാഴ് വസ്തുക്കളിൽ നിന്നും തീരദേശത്തെ ശുദ്ധീകരിക്കുകയും ശുചിത്വത്തിന്റെ പ്രാധാന്യത്തെക്കുറിച്ച് അവബോധം സൃഷ്ടിക്കുകയുമാണ് ഈ ക്യാമ്പയന്റെ ലക്ഷ്യം.
