വെള്ളിത്തിരയിലെ നടനവിസ്മയം മോഹൻലാലിന്റെ പിറന്നാൾ ദിനമാണിന്ന്. മഞ്ഞിൽ വിരിഞ്ഞ പൂക്കളിൽ വില്ലനായി എത്തി ഇന്ന് കേരള ജനതയുടെ നായകനായി മാറിയ താരമാണ് മോഹൻലാൽ. ഏറ്റെടുത്ത ഓരോ വേഷങ്ങളിലൂടെയും പങ്കുവെയ്ക്കുന്ന ചിത്രങ്ങളിലൂടെയും ഓരോ നിമിഷവും മലയാളികളെ അദ്ദേഹം അമ്പരപ്പിച്ച് കൊണ്ടേയിരിക്കുന്നു. ഇപ്പോഴിതാ പ്രിയ താരത്തിന്റെ പിറന്നാൾ ആഘോഷമാക്കുകയാണ് കേരളക്കരയൊന്നാകെ. വിവിധ മേഖലകളിൽ പ്രവർത്തിക്കുന്ന നിരവധി ആളുകളാണ് താരത്തിന് ആശംസകളുമായി രംഗത്തെത്തിയിരിക്കുന്നത്. മോഹൻലാലിന്റെ പിറന്നാൾ ദിനത്തിൽ മലൈക്കോട്ടൈ വാലിബൻ എന്ന ചിത്രത്തിലെ നടന്റെ ലുക്കാണ് വൈറൽ ആയിരിക്കുന്നത്.
കുടുമി കെട്ടി, കയ്യിൽ ടാറ്റു അടിച്ച് നിൽക്കുന്ന മോഹൻലാലിനെയാണ് ചിത്രത്തിൽ കാണാൻ സാധിക്കുന്നത്. മലൈക്കോട്ടൈ വാലിബന്റെ നിർമാതാവ് ഷിബു ബേബി ജോൺ മോഹൻലാലിന് ആശംസ അറിയിച്ച് പങ്കുവെച്ച ഫോട്ടോ ആണ് വൈറലായിരിക്കുന്നത്. ‘തലങ്ങൾ മാറിവന്ന ഒരു ആത്മബന്ധം. മോഹൻലാലിൽ തുടങ്ങി ലാലുവിലൂടെ വാലിബനിൽ എത്തിനില്ക്കുന്നു. ഹാപ്പി ബർത്ത് ഡെ ലാലു’, എന്ന അടിക്കുറിപ്പോട് കൂടിയാണ് ഷിബു ചിത്രം പങ്കുവെച്ചിരിക്കുന്നത്. പിന്നാലെ തന്നെ വിവിധ സമൂഹമാദ്ധ്യമങ്ങളിൽ ചിത്രം പ്രത്യക്ഷപ്പെടുകയായിരുന്നു.
ലിജോ ജോസ് പെല്ലിശ്ശേരി സംവിധാനം ചെയ്യുന്ന ചിത്രമാണ് മലൈക്കോട്ടൈ വാലിബൻ. അടുത്തിടെ ആണ് വാലിബന്റെ രാജസ്ഥാൻ ഷെഡ്യൂൾ പൂർത്തിയായത്. 77 ദിവസത്തെ ഷൂട്ടിംഗ് ആയിരുന്നു ഇവിടെ ഉണ്ടായിരുന്നത്. നിലവിൽ ചെന്നൈയിൽ ആണ് ഷൂട്ടിംഗ് പുരോഗമിച്ചുകൊണ്ടിരിക്കുന്നത്. ലിജോയുടെ കരിയറിലെ തന്നെ ഏറ്റവും വലിയ കാൻവാസിൽ ഒരുങ്ങുന്ന സിനിമ എന്ന പ്രത്യേകതയും വാലിബനുണ്ട്. പ്രശാന്ത് പിള്ളയാണ് ചിത്രത്തിന്റെ സംഗീത സംവിധാനം നിർവ്വഹിക്കുന്നത്.
മധു നീലകണ്ഠനാണ് ചിത്രത്തിന്റെ ഛായാഗ്രഹണം. വസ്ത്രാലങ്കാരം റോണക്സ് സേവ്യർ ആണ്. മറാഠി നടി സൊണാലി കുൽക്കർണി, ഹരീഷ് പേരാടി, മണികണ്ഠൻ ആചാരി, രാജീവ് പിള്ള, ഡാനിഷ്, ഹരിപ്രശാന്ത് വർമ, സുചിത്ര നായർ തുടങ്ങിയവർ ചിത്രത്തിൽ വേഷമിടുന്നുണ്ട്. ഷിബു ബേബി ജോണിന്റെ ജോൺ ആൻഡ് മേരി ക്രിയേറ്റീവിനൊപ്പം മാക്സ് ലാബ് സിനിമാസ്, സെഞ്ച്വറി ഫിലിംസ് എന്നിവരും ‘ നിർമ്മാണ പങ്കാളികളാണ്.
Comments