കൊല്ലം; കോഴിക്കറിക്ക് ഉപ്പ് കുറഞ്ഞതിന്റെ പേരില് ഹോട്ടലില് ഉണ്ടായ അടിപിടിയില് മൂന്നു പേര്ക്ക് കുത്തേറ്റു.മാമ്മൂട് ജംഗ്ഷന് സമീപം പ്രവര്ത്തിക്കുന്ന കുറ്റിയില് ഹോട്ടല് ഉടമയുടെ മക്കളായ മുഹമ്മദ് ഷാഫിന് (31), മുഹമ്മദ് അസര് (29), തമിഴ്നാട് തൂത്തുക്കുടി സ്വദേശി പ്രിന്സ് (35) എന്നിവര്ക്കാണ് കുത്തേറ്റത്. അടിപിടിയില് മറ്റ് മൂന്ന് പേര്ക്ക് പരിക്കേല്ക്കുകയും ചെയ്തു.
ഹോട്ടല് ഉടമയുടെ മക്കളെ കുത്തിയ തമിഴ്നാട് സ്വദേശികള്ക്ക് എതിരെ വധശ്രമത്തിന് കേസെടുത്തു. ഹോട്ടല് അധികൃതര്ക്ക് എതിരെയും കേസെടുത്തിട്ടുണ്ട്.തലയ്ക്ക് കമ്പി വടി കൊണ്ട് അടിയേറ്റ് പ്രിന്സിന്റെ മാതൃ സഹോദരന് റോബിന്സണ് (40), സുഹൃത്ത് അംബാസമുദ്രം സ്വദേശി അരുണ് (23) ഷാഫിനിന്റെ ഡ്രൈവര് റഷീദിന് ഇസ്ലാം എന്നിവരാണ് പരിക്കേറ്റ മറ്റു 3 പേര്.
കേരളത്തില് നിന്ന് ചക്ക ശേഖരിച്ച് നാട്ടിലെത്തിച്ചു വില്പന നടത്തുന്നവരാണ് തമിഴ്നാട് സ്വദേശികള്. ഇന്നലെ പുലര്ച്ചെ ഒരു മണിയോടെ ആയിരുന്നു സംഭവം.വിളമ്പിയ ചിക്കന് കറിക്ക് ഉപ്പ് കുറവാണെന്ന് പ്രിന്സ് റോബിന്സണിനോട് പറഞ്ഞു. ഇത് കേട്ട ഹോട്ടല് ജീവനക്കാരന് മുഹമ്മദ് ഷാഫിനെ വിളിച്ച് കൊണ്ടു വരികയും വാക്കുതര്ക്കം ഉണ്ടാവുകയും ചെയ്തു.
തര്ക്കത്തിനിടെ ഷഫീന് റോബിന്സണിനെ മര്ദിച്ചു. മര്ദനമേറ്റ മൂവരും ഹോട്ടല് വിട്ടു പോയി. ഉടന് അരുണിനെയും കൂട്ടി തിരിച്ചു വന്ന് ഹോട്ടല് ജീവനക്കാരുമായി വീണ്ടും ബഹളമുണ്ടാക്കി. പിന്നാലെ ഇത് വീണ്ടും സംഘര്ഷത്തിലും കത്തിക്കുത്തിലും കലാശിക്കുകയായിരുന്നു. പ്രിന്സ്, റോബിന്സണ് എന്നിവര് ചേര്ന്ന് ഹോട്ടല് ഉടമകളെ വയറ്റില് കുത്തുകയായിരുന്നു.
അതേസമയം ലെയ്സ് നല്കാത്തത്തിന്റെ പേരില് കൊല്ലത്ത് സംഘര്ഷം നടന്നിട്ട് ഒരുവര്ഷമാകുന്നതിനിടെയാണ് വീണ്ടും നിസാര കാര്യത്തിനുള്ള കത്തിക്കുത്ത്. ഇരവിപുരത്ത് 2022 ജൂലായ് 27 നായിരുന്നു സംഭവം. വാളത്തുങ്കല് സ്വദേശി നീലകണ്ഠനാണ് മര്ദ്ദനമേറ്റത്. അഞ്ചോളം പേര് നീലകണ്ഠനെ ആക്രമിക്കുന്ന വീഡിയോ സാമൂഹിക മാധ്യമങ്ങളിലും വൈറലായി.
