ഓഗസ്റ്റ് 15 ഇന്ത്യ സ്വാതന്ത്ര്യദിനം ആഘോഷിക്കുന്ന വേളയിൽ നമ്മുടെ രാജ്യത്തോടൊപ്പം തന്നെ സ്വാതന്ത്ര്യ ദിനം ആഘോഷിക്കുന്ന മറ്റു ചില രാജ്യങ്ങൾ കൂടിയുണ്ട്. രണ്ട് നൂറ്റാണ്ടോളം നീണ്ടു നിന്ന കൊളോണിയൽ ഭരണത്തിൽ നിന്നുമാണ് നമ്മുടെ രാജ്യത്തിന് മുക്തി ലഭിക്കുന്നത്. ഇത്തരത്തിൽ സ്വതന്ത്ര്യം ആഘോഷിക്കുന്ന മറ്റ് രാജ്യങ്ങളെക്കുറിച്ച് കൂടി അറിയാം.
ഉത്തര കൊറിയ
35 വർഷത്തോളം നീണ്ടു നിന്ന ജാപ്പനീസ് അധിനിവേശത്തിന്റെയും കൊളോണിയൽ ഭരണത്തിന്റെയും അന്ത്യം കുറിക്കുന്നതിനായി യുദ്ധത്തിലേർപ്പെടേണ്ടതായി വന്നു കൊറിയയ്‌ക്ക്. സഖ്യസേനയുടെ സഹായത്തോടെ ജാപ്പനീസ് അധിനിവേശത്തിന് അന്ത്യം കുറിക്കുകയായിരുന്നു. പിന്നീട് ഉത്തര കൊറിയ വർഷം തോറും ഓഗസ്റ്റ് 15 ദേശീയ വിമോചന ദിനം എന്ന നിലയിൽ ആഘോഷിക്കാൻ തുടങ്ങുകയായിരുന്നു.
ദക്ഷിണ കൊറിയ
ഉത്തര കൊറിയയിലെ സമാന സഹാചര്യമായിരുന്നു ഇവിടെയും. ഇത് തന്നെയാണ് ഈ ദിവസം സ്വാതന്ത്ര്യ ദിനം ആഘോഷിക്കുന്നതിന് പിന്നിലെ കാരണവും. കൂടാതെ ഈ ദിനത്തെ ഉത്തരകൊറിയ വിശേഷിപ്പിക്കുന്നത് ഗ്വാംഗ്‌ബോക്ജിയോൽ എന്നാണ്. ഈ വാക്കിന്റെ അർത്ഥമെന്നത് വെളിച്ചം തിരികെ എത്തിയ ദിനം എന്നാണ്. രണ്ടാം ലോകമഹായുദ്ധത്തിൽ ജപ്പാന്റെ കീഴടങ്ങൽ ആഘോഷിക്കുന്നതിനായും ഈ ദിനം ആചരിക്കുന്നു.
ബഹ്‌റൈൻ
ബ്രീട്ടീഷ് കൊളോണിയൽ ഭരണത്തിന് കീഴിലായിരുന്നു ബഹ്‌റൈനും. 1971 ഓഗസ്റ്റ് 15-നാണ് ഇതിൽ നിന്നും സ്വാതന്ത്ര്യം ലഭിക്കുന്നത്. ഇന്ത്യ സ്വാതന്ത്ര്യം നേടി രണ്ട് പതിറ്റാണ്ടുകൾക്ക് ശേഷമാണ് ഈ രാജ്യത്തിന് സ്വാതന്ത്ര്യം എന്ന സ്വപ്‌നം സാക്ഷാത്കരിക്കപ്പെടുന്നത്. 1960-കളുടെ തുടക്കത്തിൽ സൈന്യത്തെ പിൻവലിക്കുകയാണെന്ന് ബ്രിട്ടീഷുകാർ പ്രഖ്യപിച്ചിരുന്നു. ഇതിന് ശേഷം ബഹ്‌റൈനിലെ ജനസംഖ്യയെക്കുറിച്ചുള്ള ഐക്യരാഷ്‌ട്ര സഭയുടെ സർവേയ്‌ക്ക് പിന്നാലെയാണ് സ്വതന്ത്ര്യം ലഭിക്കുന്നത്.
റിപ്പബ്ലിക് ഓഫ് കോംഗോ
ആഫ്രിക്കയുടെ പടിഞ്ഞാറൻ തീരത്ത് സ്ഥിതി ചെയ്യുന്ന രാജ്യമാണിത്. ബ്രാസാവില്ലെ എന്നും കോംഗോ അറിയപ്പെടുന്നു. 1960 ഓഗസ്റ്റ് 15-നാണ് ഫ്രാൻസിൽ നിന്നും രാജ്യം സ്വതന്ത്രമാകുന്നത്. ഇത് കോംഗോ ദേശീയ ദിനം എന്നും അറിയപ്പെടുന്നു.
ലീച്ചെൻസ്റ്റീൻ
യൂറോപ്പിലെ ഏറ്റവും ചെറുതും എന്നാൽ സമ്പന്നമായതുമായ രാജ്യമാണിത്. വാസ്തവത്തിൽ ഇതൊരു സ്വാതന്ത്ര്യദിനം അല്ലെങ്കിലും ഓഗസ്റ്റ് 15-ആണ് ദേശീയ ദിനമായി ആചരിക്കുന്നത്.
