ബെംഗളുരു: രാജ്യത്തിന്റെ അഭിമാന ദൗത്യമായ ചന്ദ്രയാൻ-3 നെ പരിഹസിച്ച സംഭവത്തിൽ നടൻ പ്രകാശ് രാജിനെതിരെ പോലീസിൽ പരാതി. കർണാടകയിലെ ഒരു എൻജിഒയാണ് ബാനഹട്ടി പോലീസ് സ്റ്റേഷനിൽ പരാതി നൽകിയിരിക്കുന്നത്. നടൻ രാജ്യത്തിന്റെ അഭിമാന ദൗത്യത്തെ പരിഹസിച്ചതായും ഉചിതമായ നടപടി സ്വീകരിക്കണമെന്നും പരാതിയിൽ പറയുന്നു.
ഇസ്രോ മുൻ ചെയർമാർ കെ.ശിവൻ ലുങ്കിയുടുത്ത് ചായ അടിക്കുന്ന ചിത്രമാണ് പ്രകാശ് രാജ് സമൂഹമാദ്ധ്യമത്തിൽ പങ്കുവെച്ചത്. ‘ബ്രേക്കിങ് ന്യൂസ്: വിക്രം ലാൻഡർ പകർത്തിയ ചന്ദ്രനിലെ ആദ്യ ചിത്രം’ എന്ന അടിക്കുറിപ്പോടെയായിരുന്നു ചിത്രം പങ്കുവെച്ചത്. ഇതിന് നിരവധി പേരാണ് പ്രകാശ് രാജിനെതിരെ രംഗത്ത് വന്നത്. ലോക രാജ്യങ്ങൾ പോലും ഏറെ പ്രതീക്ഷയോടെ കാത്തിരിക്കുന്ന മഹത്തായ ഒരു ദൗത്യത്തെ പ്രകാശ് രാജ് നിസാരവത്കരിക്കുകയാണെന്നും ശക്തമായി അപലപിക്കുന്നുവെന്നും ഉപയോക്താക്കൾ കമന്റ് ചെയ്തിരുന്നു.
സംഭവത്തിൽ പ്രതിഷേധം ശക്തമായതോടെ ന്യായീകരണവുമായി പ്രകാശ് രാജ് രംഗത്തുവന്നിരുന്നു. തന്റെ ട്വീറ്റ് ഒരു തമാശ മാത്രമായിരുന്നുവെന്നാണ് പ്രകാശ് രാജിന്റെ വാദം. വെറുപ്പ് വെറുപ്പിനെ മാത്രമേ കാണൂ. ആംസ്ട്രോംഗിന്റെ കാലത്തുള്ള തമാശയാണ് പറഞ്ഞത്. കേരളത്തിലെ ചായ വില്പനക്കാരനെയാണ് താൻ ഉദ്ദേശിച്ചതെന്നും പ്രകാശ് രാജ് പറഞ്ഞു.
Comments