വാട്ട്സ്ആപ്പിലും പുതിയ എഐ സാങ്കേതിക വിദ്യ അവതരിപ്പിക്കാനൊരുങ്ങി മെറ്റ. മൈക്രോസോഫ്റ്റ്, ഗൂഗിൾ എന്നിങ്ങനെ നിരവധി കമ്പനികളാണ് ഇതിനോടകം തന്നെ പ്രവർത്തനങ്ങൾ മെച്ചപ്പെടുത്തുന്നതിന്റെ ഭാഗമായി എഐ സാങ്കേതിക വിദ്യ പരീക്ഷിച്ചിരിക്കുന്നത്. മാർക്ക് സക്കർബർഗിന്റെ ഉടമസ്ഥതയിലുള്ള മെറ്റയും മത്സരിച്ച് ഒപ്പം തന്നെയുണ്ട്. മെഷീൻ ലേണിംഗ്, ആർട്ടിഫിഷ്യൽ ഇന്റലിജൻസ് എന്നിവ ഉൾപ്പെടുത്തി നിരവധി പ്രോജക്ടുകളിലാണ് കമ്പനി ശ്രദ്ധ കേന്ദ്രീകരിക്കുന്നത്.
ഇതിനിടെയാണ് വാട്ട്സ്ആപ്പിലേക്കും പുതിയ എഐ ഫീച്ചർ അവതരിപ്പിക്കാൻ കമ്പനി പദ്ധതിയിട്ടത്. ഓപ്പൺ എഐയുടെ DALL-E അല്ലെങ്കിൽ മിഡ് ജേർണി പോലുള്ള നിലവിലെ ജനറേറ്റീവ് എഐ മോഡലുകൾ എങ്ങനെ പ്രവർത്തിക്കുന്നു എന്നതിന് സമാനമായിരിക്കും പുതിയ ഫീച്ചർ. ചാറ്റ് എക്സ്പീരിയൻസ് മെച്ചപ്പെടുത്തുന്നതിനായി എഐ സ്റ്റിക്കറുകൾ ഉപകരിക്കുമെന്ന വിലയിരുത്തലിലാണ് മെറ്റയുടെ പുതിയ നീക്കം.
ലാമ-2 സാങ്കേതികവിദ്യയും എമു എന്ന ഇമേജ് ജനറേഷന് വേണ്ടിയുള്ള അടിസ്ഥാന മോഡലും ഉപയോഗിച്ചാണ് നീക്കം. ആപ്പിന്റെ എഐ ടൂൾ ടെക്സ്റ്റിൽ ഉൾപ്പെടുത്തിയിരിക്കുന്നവയെ നിമിഷങ്ങൾക്കുള്ളിൽ ഒന്നിലധികം സ്റ്റിക്കറുകളുടെ രൂപത്തിൽ കാണിക്കുന്നു. നിലവിൽ എല്ലാ വാട്ട്സ്ആപ്പിലും ഈ സേവനം ലഭ്യമാണ്. ഉപയോക്താക്കളുടെ ആവശ്യാനുസൃതമാണ് സ്റ്റിക്കറുകൾ ക്രിയേറ്റ് ചെയ്യപ്പെടുന്നത്. നിലവിൽ ഇംഗ്ലീഷിൽ മാത്രമാണ് ഈ സേവനം ലഭ്യമാകുക. എഐ സ്റ്റിക്കറുകൾ സൃഷ്ടിക്കണമെങ്കിൽ ഇംഗ്ലീഷിൽ വിവരണം നൽകേണ്ടതുണ്ട്.