വളരെ പെട്ടെന്ന് തന്നെ യുവ മനസുകളിൽ ഇടം നേടിയ സമൂഹമാദ്ധ്യമ പ്ലാറ്റ്ഫോമാണ് ഇൻസ്റ്റഗ്രാം. ഈ കഴിഞ്ഞ ഒക്ടോബർ ആറിനാണ് ഇൻസ്റ്റഗ്രാം വാർഷികം ആഘോഷിച്ചത്. അടുത്തിടെ നിരവധി ഫീച്ചറുകളാണ് ഉപയോക്താക്കളെ ആകർഷിക്കുന്നതിന് വേണ്ടി മെറ്റയുടെ ഉടമസ്ഥതയിലുള്ള കമ്പനി പരീക്ഷിച്ചുകൊണ്ടിരിക്കുന്നത്. ഇപ്പോഴിതാ ഏറ്റവും പുതിയ അപ്ഡേറ്റുകൾ പങ്കുവെച്ചിരിക്കുകയാണ് കമ്പനി. ഉപയോക്താക്കളുടെ അക്കൗണ്ടുകളിലെ പോസ്റ്റുകളിലേക്ക് ചിത്രങ്ങളും വീഡിയോകളും ഉൾപ്പെടുത്താൻ സുഹൃത്തുക്കൾക്ക് അനുവാദം നൽകുന്ന പുതിയ ഫീച്ചറാണ് അവതരിപ്പിച്ചിരിക്കുന്നത്.
ഒരു ചിത്രം പോസ്റ്റ് ചെയ്യുന്നതിന് മുമ്പായി ഉപയോക്താവിനെ പിന്തുടരുന്നവർക്ക് ഫോട്ടോകളും വീഡിയോകളും സമർപ്പിക്കുന്നതിനുള്ള സംവിധാനം ഓൺ ചെയ്യാവുന്നതാണ്. ഓരോ ചിത്രം ചേർക്കുന്നതിനും ഇത്തരത്തിൽ അംഗീകാരം നൽകേണ്ടതുണ്ട്. പോസ്റ്റിന്റെ ഇടത് ഭാഗത്തായാണ് ഇതിന്റെ ഓപ്ഷൻ ഉൾപ്പെടുത്തിയിരിക്കുന്നത്.
ഒരുമിച്ച് പങ്കെടുത്ത ചടങ്ങുകളോ ഔട്ടിംഗുകളുടെയോ ഓർമ്മകൾ പങ്കിടുന്നതിന് സുഹൃത്തുക്കളെ ക്ഷണിക്കുന്നതിന് വേണ്ടിയാണ് ഈ സംവിധാനം. അടുത്തിടെ ലൂപ്പിംഗ് വീഡിയോയിലൂടെ ഉപയോക്താക്കളെ അവരുടെ പ്രൊഫൈൽ ചിത്രം അപ്ഡേറ്റ് ചെയ്യാൻ അനുവദിക്കുന്ന ഫീച്ചർ ഇൻസ്റ്റഗ്രാം അനുവദിച്ചിരുന്നു.
