വിചാരിക്കുന്നതിലും അപ്പുറത്താണ് ഭൂമിയിൽ മാറ്റങ്ങൾ സംഭവിക്കുന്നത്. അത്തരത്തിൽ കൈവിട്ട പട്ടം പോലെയാണ് കാലാവസ്ഥ മാറുന്നത്. കാലാവസ്ഥ വ്യതിയാനത്തെ ചെറുക്കാൻ പല വഴികളും തേടുന്നവരാണ് നാം. നാസയും ഇസ്രോയും സംയുക്തമായി മാറിവരുന്ന കാലാവസ്ഥയ്ക്ക് പിന്നിലെ കാരണം അന്വേഷിക്കാനൊരുങ്ങുകയാണ്. കാലാവസ്ഥയിലുണ്ടാകുന്ന മാറ്റം ഭൂമിയുടെ ആവാസവ്യവസ്ഥയെ എങ്ങനെ ബാധിക്കുന്നുവെന്ന് കണ്ടെത്തുന്നതിനായി ‘നിസാർ’ എന്ന ഉപഗ്രഹ ദൗത്യത്തിനാണ് ഒരുങ്ങുന്നത്.
അന്തരീക്ഷത്തിലെ ഹരിതഗൃഹ വാതകങ്ങളെ നിയന്ത്രിക്കുന്നതിൽ നിർണായക പങ്ക് വഹിക്കുന്ന വനങ്ങളെയും തണ്ണീർത്തടങ്ങളെയും കുറിച്ച് പഠിച്ച് നിർണായക വിവരങ്ങൾ ലഭ്യമാക്കുകയാണ് ദൗത്യത്തിന്റെ ലക്ഷ്യം. 2024-ന്റെ തുടക്കത്തിലാകും ദൗത്യം വിക്ഷേപിക്കുക. അത്യാധുനിക റഡാർ സംവിധാനമാണ് നിസാർ ഉപഗ്രഹത്തിൽ സജ്ജമാക്കിയിട്ടുള്ളത്. ഭൂമിയിലെ കര-ഹിമ പ്രതലങ്ങളെ ഓരോ 12 ദിവസം കൂടുമ്പോഴും രണ്ട് വട്ടം നിസാർ സ്കാൻ ചെയ്യും. കാർബൺ പിടിച്ചെടുക്കുന്നതിന്റെയും പുറത്തുവിടുന്നതിന്റെയും തോത് അറിയാൻ ഗവേഷകരെ സഹായിക്കാൻ ഇതുവഴി സാധിക്കും.
അന്റാർട്ടികയിലെ മഞ്ഞുപാളികൾ ഉരുകുന്നുവെന്നും ഓസോൺ പാളിയിലെ വിള്ളലുകൾ വർദ്ധിക്കുന്നുവെന്നും പഠനങ്ങൾ പുറത്തുവന്നിരുന്നു. വളരെ വലിയ കാലാവസ്ഥ വ്യതിയാനത്തിന് സാധ്യതയുണ്ടെന്ന സൂചനയാണ് ഇതിലൂടെ പുറത്തുവരുന്നത്. ഇതിന് പിന്നിലെ കാരണങ്ങളെ കണ്ടെത്തി നിരീക്ഷിക്കുകയാണ് നിസാർ ദൗത്യത്തിന്റെ ലക്ഷ്യം. കാടുകളിൽ മരങ്ങളിലും തണ്ണീർത്തടങ്ങളിൽ അവയുടെ ജൈവ മണ്ണിന്റെ പാളികളിലുമാണ് കാർബൺ സൂക്ഷിക്കുന്നത്. ഈ സംവിധാനങ്ങളിലുണ്ടാകുന്ന തടസ്സം അന്തരീക്ഷത്തിലേക്ക് കാർബൺ ഡൈ ഓക്സൈഡും മീഥെയ്നും അമിതമായി പുറന്തള്ളുന്നു. ക്രമേണ ഇത് ആഗോളതാപനത്തിന് വഴിവെക്കുന്നു.
വനത്തിന്റെ മേലാപ്പുകളിൽ തുടങ്ങി മരത്തിന്റെ താഴെ ഭാഗത്തേക്ക് വരെ റഡാർ പ്രവർത്തിക്കും. ഇത് വനമേഖലയുടെ സാന്ദ്രത കണക്കാക്കാനും കാലക്രമേണ മാറ്റങ്ങൾ ട്രാക്കുചെയ്യാനും ഗവേഷകരെ സഹായിക്കും. ഭൂപ്രതലത്തിന്റെ അഞ്ച് മുതൽ എട്ട് ശതമാനം വരെയാണ് തണ്ണീർത്തടങ്ങൾ ഉള്ളതെങ്കിലും ഈ മണ്ണിൽ 20 മുതൽ 30 വരെ ശതമാനത്തോളം കാർബൺ അടങ്ങിയിരിക്കുന്നു. തണ്ണീർത്തടങ്ങളിൽ വെള്ളപ്പൊക്കം ഉണ്ടാകുമ്പോൾ ബാക്ടീരിയകൾ മണ്ണിലെ ജൈവവസ്തുക്കളെ ദഹിപ്പിക്കുകയും മീഥെനിന്റെ ഉത്പാദനം വർദ്ധിപ്പിക്കുകയും ചെയ്യുന്നു. തണ്ണീർത്തടങ്ങളിലെ വെള്ളം വറ്റുമ്പോൾ സംഭരിച്ച് വെച്ചിരിക്കുന്ന കാർബൺ, ഓക്സിജനുമായി കൂടിച്ചേർന്ന് കാർബൺ ഡൈ ഓക്സൈഡ് ആയി മാറുന്നു. ഓരോ ചെറിയ മാറ്റങ്ങളെ വരെ നിരന്തരം നിരീക്ഷിച്ച് വ്യതിയാനങ്ങളെ പഠിക്കാൻ നിസാറിന് കഴിയും.
മനുഷ്യൻ നിർമ്മിക്കുന്ന വനവത്കരണവും മറ്റ് ഭൂവിനിയോഗ മാറ്റങ്ങളും 11 ശതമാനത്തോളം ഹരിതഗൃഹ വാതകങ്ങളെയാണ് പുറന്തള്ളുന്നത്. ലോകമെമ്പാടും വനവത്കരണം നടത്തുന്നത് കാർബൺ ചക്രത്തെ എങ്ങനെ സ്വാധീനിക്കുന്നുവെന്നും ആഗോളതാപനത്തിന് എത്രമാത്രം സംഭാവന നൽകുന്നുവെന്നും നിസാർ നൽകുന്ന വിവരങ്ങൾ വഴി കണ്ടെത്താൻ സാധിക്കും.
ആവാസവ്യവസ്ഥയിലെ മാറ്റങ്ങൾ ട്രാക്കുചെയ്യുന്നതിന് പുറമേ, ഭൂകമ്പങ്ങൾ, അഗ്നിപർവ്വത സ്ഫോടനങ്ങൾ, മണ്ണിടിച്ചിലുകൾ എന്നിവയുടെ ചലനാത്മകത മനസ്സിലാക്കാൻ ഗവേഷകരെ സഹായിക്കുന്നതിനായി ഭൂമിയുടെ ചലനത്തെക്കുറിച്ചുള്ള വിവരങ്ങൾ നാസർ ശേഖരിക്കും. ഹിമാനികൾ, കടലിലെ ഐസ് എന്നിവയുടെ ചലനങ്ങളും ഉരുകുന്നതും നിസാർ ഉപഗ്രഹം ട്രാക്ക് ചെയ്യും.