കാസർകോട്: നവകേരള സദസിൽ മുഖ്യമന്ത്രിക്ക് പരാതിയുമായി സർക്കാരിന്റെ ബെവ്കോ ഔട്ട്ലെറ്റിൽ നിന്നും മദ്യം വാങ്ങുന്ന മദ്ധ്യവയസ്കൻ. കേരള സ്റ്റേറ്റ് ബിവറേജസ് കോർപ്പറേഷനെതിരെയാണ് പരാതി. ബെവ്കോയിൽ വീര്യം കുറഞ്ഞ മദ്യമാണ് വിൽക്കുന്നുതെന്നാണ് കാസർകോട് സ്വദേശി വിശ്വംഭരൻ കരിച്ചേരിയുടെ ആരോപണം.
‘പ്രിയപ്പെട്ട മുഖ്യമന്ത്രി, കള്ളിന് കിക്ക് കിട്ടുന്നില്ല. ഗോവ സാധനം ക്വാർട്ടർ കിട്ടുന്നില്ല, മത്തുമില്ല. ദിവസം 400 രൂപ കൊടുത്ത് കുടിക്കാൻ പറ്റുന്നില്ല. ഇപ്പോൾ എന്തെങ്കിലും ചെയ്യണം.’’- എന്നാണ് സ്വന്തം കൈപ്പടയിൽ വിശ്വംഭരൻ കത്തിൽ എഴുതിയിരിക്കുന്നത്. കാസർകോട് ടൗൺ ഭണ്ഡാരി റോഡിലുള്ള ബെവ്കോ ഔട്ട്‌ലെറ്റിലെ സ്റ്റോർ ഇൻചാർജ് ശ്രീകുമാറിനാണ് വിശ്വംഭരൻ നിവേദനം നൽകിയത്.
മുഖ്യമന്ത്രിയോടാണ് വിശ്വംഭരന്റെ പരാതിയെങ്കിലും നവകേരള സദസിലേക്ക് ബെവ്കോ അധികൃതർ പരാതി കൈമാറിയിട്ടില്ല. നവകേരള സദസ് നടക്കുന്ന വേദിയിലേക്ക് പോകാൻ കഴിയില്ലെന്നും അതിനാലാണ് പരാതി ബെവ്കോ അധികൃതർക്ക് നൽകിയതെന്നും വിശ്വംഭരൻ പറഞ്ഞു.
