തിരുവന്തപുരം: ഗവർണർ ആരിഫ് മുഹമ്മദ് ഖാനെതിരെ നിലവാരമില്ലാത്തെ പദപ്രയോഗം നടത്തിയ റിപ്പോർട്ടർ ടിവി കൺസട്ടിംഗ് എഡിറ്റർ അരുൺ കുമാറിനെ ശക്തമായ ഭാഷയിൽ വിമർശിച്ച് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. സർക്കാരിന്റെ ധിക്കാരത്തിന് മുന്നിൽ ഗവർണർ വഴങ്ങി കൊടുക്കാതെ നിൽക്കുന്ന അവസരത്തിലാണ് പിണറായി സർക്കാരിന്റെ പക്ഷം പിടിച്ച് ആരിഫ് മുഹമ്മദ് ഖാനെ അരുൺ കുമാർ പരിഹസിച്ചത്. ഇതിനായി മാദ്ധ്യമ പ്രവർത്തകൻ പ്രയോഗിച്ച അപക്വമായ വാക്കുകൾ ചൂണ്ടിക്കാണിച്ചു കൊണ്ടാണ് ബിജെപി അദ്ധ്യക്ഷന്റെ വിമർശനം.
‘കുമ്മനടിച്ച് കയറുന്ന വൃദ്ധദാസൻമാരുടെ പടുകൂറ്റൻ ബംഗ്ലാവുകളായി രാജ്ഭവൻ മാറിയിട്ട് കാലമേറെയായി’ എന്നായിരുന്നു അരുൺ കുമാർ നടത്തിയ പ്രസ്താവന. ബിജെപി നേതാവ് കുമ്മനം രാജശേഖരനെ ഇകഴ്‌ത്താനും പരിഹസിക്കാനും ഇടത് സൈബർ ഇടങ്ങൾ കെട്ടിപ്പൊക്കിയ വാക്ക് ഉപയോഗിച്ചായിരുന്നു ഗവർണറെ പരിഹസിച്ചത്. മാത്രമല്ല, ഗവർണറുടെ പ്രായത്തെയും കളിയാക്കി. ഇതിനെതിരെയാണ് ബിജെപി അദ്ധ്യക്ഷൻ സമൂഹമാദ്ധ്യമത്തിലൂടെ ശക്തമായി പ്രതികരിച്ചിരിക്കുന്നത്.
“ഇത്തരം തറ ട്രോളുകൾ മാദ്ധ്യമ പ്രവർത്തകർ വിളമ്പുകയും അത് പിന്നീട് പോസ്റ്ററായി അടിച്ചിറക്കുകയും ചെയ്യുന്നത് ശുദ്ധ പോക്രിത്തരമാണ്. ഉത്തരവാദപ്പെട്ട മാദ്ധ്യമങ്ങളുടെ അന്തസ്സിനു ചേർന്ന പണിയല്ലിതെന്ന് പറയാതെ നിർവ്വാഹമില്ല. അത്തരക്കാരെ മാദ്ധ്യമ പ്രവർത്തകരായി കാണാനാവില്ല. വെറും പോരാളി ഷാജിമാരുടെ നിലവാരത്തിലേക്ക് മാദ്ധ്യമപ്രവർത്തകർ തരംതാഴരുത്. ഉള്ളിലുള്ള തറ കമ്മിത്തരം വീട്ടിൽ വെച്ചിട്ടുവേണം ഈ പണിക്കിറങ്ങാൻ”- കെ.സുരേന്ദ്രൻ ഫേസ്ബുക്കിൽ കുറിച്ചു.
