ഐഫോണിലേക്ക് പുതിയ ഐഒഎസ് 17.2 അപ്ഡേറ്റ് അവതരിപ്പിച്ച് ആപ്പിൾ. ബഗ്ഗുകളും മറ്റ് പ്രധാന പ്രശ്നങ്ങളും പരിഹരിക്കുന്നതിനുള്ള സുരക്ഷാ അപ്ഡേറ്റാണിത്. കൂടാതെ നിരവധി പുതിയ ഫീച്ചറുകളും ഇതിൽ ഉൾപ്പെടുത്തിയിട്ടുണ്ടെന്ന് കമ്പനി അറിയിച്ചു. ഐഫോൺ 15 പ്രോ സീരീസിൽ പുതിയ ജേണൽ ആപ്പ്, സ്പെഷ്യൽ വീഡിയോ കാപ്ചർ എന്നിവ ഉണ്ടാകും. ഇതിന് പുറമെ അപ്ഡേറ്റ് ചെയ്ത വെതർ ആപ്പും മെസേജ് ആപ്പും മികച്ച സേവനങ്ങളോടെ ഉപയോക്താക്കളിലേക്കെത്തും.
നിലവിൽ 17.1.2 വേർഷൻ ഉപയോഗിക്കുന്ന ഐഫോൺ ഉപയോക്താക്കൾക്ക് 1.5 ജിബിയുടെ അപ്ഡേറ്റ് സൈസാണ് ഇൻസ്റ്റാൾ ചെയ്യുന്നതിന് ആവശ്യം. പുതിയ അപ്ഡേറ്റ് ഇൻസ്റ്റാൾ ചെയ്യുന്നതോടെ ഐഫോൺ 15, 15 പ്രോ മാക്സ് ഫോണുകളിൽ സ്പെഷ്യൽ വീഡിയോ റെക്കോർഡിംഗ്, 3ഡി വീഡിയോ എന്നിവ ചിത്രീകരിക്കുന്നതിനുള്ള ഫീച്ചറുകൾ ലഭ്യമാകും. പുതിയ അപ്ഡേറ്റുകൾ ഇനി അവതരിപ്പിക്കാനിരിക്കുന്ന വിഷൻ പ്രോ വിആർ ഹെഡ്സെറ്റിലും പവർ ഹെഡ്സെറ്റിലും പ്രവർത്തിക്കും.
പ്രധാന ക്യാമറയിലൂടെയും അൾട്രാ വൈഡ് ആംഗിൾ ക്യാമറയിലൂടെയും ഒരേ സമയം തന്നെ ദൃശ്യങ്ങൾ പകർത്തുകയും ലിഡാർ സെൻസറിന്റെ സഹായത്തോടെ ഇവ കൂട്ടിച്ചേർത്ത് 3ഡി വീഡിയോ എന്ന രൂപത്തിൽ അവതരിപ്പിക്കാനും സാധിക്കും. എന്നാൽ ഇവ ഐഫോണിൽ തന്നെ കാണാനാകില്ല. ഇതിന് വിആർ ഹെഡ്സെറ്റിന് സമാനമായ മറ്റ് ഉപകരണങ്ങൾ വേണ്ടി വന്നേക്കും. പുതിയ അപ്ഡേറ്റിനൊപ്പം എത്തിയ ജേണൽ ആപ്പ് ഈ വർഷമാണ് ആദ്യമായി അവതരിപ്പിച്ചത്. 17.2 അപ്ഡേറ്റ് പ്രവർത്തിക്കുന്ന എല്ലാ ഐഫോണുകളിലും ജേണൽ ആപ്പ് ലഭ്യമാകുമെന്ന് ആപ്പിൾ അറിയിച്ചിരുന്നു.
17.2 അപ്ഡേറ്റ് ഇൻസ്റ്റാൾ ചെയ്യുന്നതോടെ ഐഫോൺ 13,14,15 സീരിസുകളില് ക്യുഐ2 വയർലെസ് ചാർജിംഗ് സ്റ്റാൻഡേർ ലഭിക്കുന്നതാണ്. ഇതിലൂടെ ഫോണുകൾ 15 വാട്ട് വരെ മാഗ് സേഫ് അല്ലാത്ത അംഗീകൃത വയർലെസ് ചാർജറുകൾ ഉപയോഗിച്ച് വേഗത്തിൽ തന്നെ ചാർജ്ജ് ചെയ്യാനാകും. ഐഒഎസ് അപ്ഡേറ്റിന്റെ കൂടെ പുതിയ മാറ്റങ്ങളുമായി വാച്ച് ഒഎസ് 10.2 അപ്ഡേറ്റും ടിവിഒഎസ് 17.2 അപ്ഡേറ്റും അവതരിപ്പിച്ചിട്ടുണ്ട്.
