ലക്നൗ : അയോദ്ധ്യയിലെ ഹോട്ടൽ നിരക്കുകളിൽ വൻ വർദ്ധനവ് . ജനുവരി 22-23 വരെ അയോദ്ധ്യയിലെ ഹോട്ടലുകളിൽ ഒരു രാത്രി ബുക്കിങ്ങിനുള്ള നിരക്ക് 70,000 രൂപയിലേറെയായി.
ജനുവരി 22 ന് പ്രാണ പ്രതിഷ്ഠാ ദിനത്തിൽ രാജ്യത്തുടനീളമുള്ള ഏകദേശം 3 മുതൽ 5 ലക്ഷം വരെ ഭക്തർ അയോദ്ധ്യയിലെത്തുമെന്നാണ് റിപ്പോർട്ടുകൾ. ഈ കണക്ക് ഇനിയും ഉയർന്നേക്കാം. അയോദ്ധ്യയിലെ ഒട്ടുമിക്ക ഹോട്ടലുകളും ഇതിനോടകം നിറഞ്ഞിരിക്കുകയാണ്. ഈ തീയതികളിൽ മുറികൾ ലഭ്യമാകുന്ന ഹോട്ടലുകളിൽ നിരക്കുകൾ കുതിച്ചുയർന്നു. വരും കാലങ്ങളിൽ അയോധ്യയിൽ ഹോട്ടൽ ബിസിനസിൽ വൻ കുതിച്ചുചാട്ടം ഉണ്ടായേക്കാം. ഇത് കണക്കിലെടുത്ത് റാഡിസൺ ബ്ലൂ, ഒബ്റോയി , താജ് ഹോട്ടൽസ് ശൃംഖല സ്ഥാപനങ്ങളും അയോദ്ധ്യയിൽ അവരുടെ ഹോട്ടലുകൾ നിർമ്മിക്കാൻ ഒരുങ്ങുകയാണ്. ഇതു വഴി ആയിരങ്ങൾക്ക് ജോലിയും ലഭിക്കും .
അയോദ്ധ്യയ്ക്ക് സമീപമുള്ള ഫൈസാബാദിലെ സിഗ്നെറ്റ് കളക്ഷൻ ഹോട്ടലിൽ ഒരു മുറിയുടെ വാടക 70,240 രൂപയാണ്. ദി രാമായണ ഹോട്ടലിൽ ഒരു മുറി പ്രതിദിനം ഏകദേശം 40,000 രൂപ വാടകയ്ക്ക് ലഭ്യമാണ് .അയോദ്ധ്യാ ഹോട്ടലിൽ ഒരു ദിവസത്തെ വാടകയായി 33,920 രൂപ നൽകേണ്ടി വരും. അയോദ്ധ്യാ റെസിഡൻസിയിൽ വാടക 20000 രൂപ വരെ എത്തി. ഇതുകൂടാതെ, ചെറുതും വലുതുമായ പല ഹോട്ടലുകളിലും നിരക്ക് പലമടങ്ങ് വർധിച്ചു.
