കുത്തരി, വെള്ളയരി, ബസുമതി അരി തുടങ്ങിയ വിവിധയിനം അരികളെ കുറിച്ച് കേട്ടിട്ടുണ്ടെങ്കിലും കറുത്ത അരി അഥവാ ബ്ലാക്ക് റൈസ് എന്നതിനെ കുറിച്ച് അറിയുന്നവർ വളരെ ചുരുക്കമായിരിക്കും. പേര് കേൾക്കുന്നതേ പലരും ആദ്യമൊന്ന് നെറ്റി ചുളിച്ചേക്കാം. എന്നാൽ ബ്ലാക്ക് റൈസും വിപണിയിൽ ലഭ്യമാണ്. സാധാരണ അരിയേക്കാൾ ഗുണങ്ങളാണ് ഈ അരി നൽകുന്നത്. ഗുണമറിഞ്ഞ് കറുത്ത അരി ഭക്ഷണത്തിൽ ഉൾപ്പെടുത്താം.
- ആന്റി ഓക്സിഡന്റുകളാൽ സമ്പുഷ്ടമാണ് കറുത്ത അരി. പല രോഗങ്ങളെയും ചെറുക്കാനുള്ള കഴിവ് ഇതിനുണ്ട്. ഹൃദ്രോഗം, സന്ധിവാതം, അൽഷിമേഴ്സ് തുടങ്ങിയവയെ തടയാനും രോഗപ്രതിരോധ ശേഷിയും വർദ്ധിപ്പിക്കാനും കറുത്ത അരി ഉപയോഗിക്കാവുന്നതാണ്.
- പ്രമേഹ രോഗികൾക്ക് വിരോധികളാണ് അരിയും അരിയാഹാരവും. എന്നാൽ സുരക്ഷിതമായി കഴിക്കാവുന്ന ഒന്നാണ് ബ്ലാക്ക് റൈസ്. കറുത്ത അരിയിൽ അടങ്ങിയിരിക്കുന്ന ആന്തോസയാനിൻ രക്തത്തിലെ പഞ്ചസാരയുടെ അളവ് നിയന്ത്രിക്കുകയും അതുവഴി പ്രമേഹത്തെ നിയന്ത്രിക്കുകയും ചെയ്യുന്നു. ഇതിലടങ്ങിയിരിക്കുന്ന ആന്തോസയാനിൻ ഇൻസുലിൻ ഉൽപ്പാദിപ്പിക്കുന്നതിനും സഹായിക്കുന്നു.
- ചോറ് കഴിച്ചാൽ ഭാരം വർദ്ധിക്കുമെന്ന് വിശ്വസിക്കുന്നവരാണ് ഭൂരിഭാഗം പേരും. എന്നാൽ ഇത്തരത്തിലുള്ള ആശങ്കകളെ ഒഴിവാക്കാൻ കറുത്ത അരി സഹായിക്കും. ദഹനം മെച്ചപ്പെടുത്താനും ശരീരഭാരത്തെ നിയന്ത്രിക്കാനും ബ്ലാക്ക് റൈസ് ശീലമാക്കാം. ഇതിലടങ്ങിയിരിക്കുന്ന നാരുകളാണ് ശരീരഭാരം കുറയ്ക്കാൻ അനുവദിക്കുന്നത്.
- ആരോഗ്യമുള്ള ഹൃദയമാണ് ആവശ്യമെങ്കിൽ ഇടക്കെങ്കിലും കറുത്ത അരി കഴിക്കണം. പകൽ സമയത്ത് ഇത് കഴിച്ചാൽ ധമനികളിൽ കൊളസ്ട്രോൾ അടിഞ്ഞുകൂടില്ല. അതിനാൽ തന്നെ ഹൃദയാഘാതം പോലുള്ള അപകടസാധ്യതകളെ തടയുന്നു.
- തലച്ചോറിന്റെ ആരോഗ്യത്തെയും കറുത്ത അരി സ്വാധീനിക്കുന്നു. ഇതിൽ അടങ്ങിയിരിക്കുന്ന ആന്തോസയാനിൻ മാനസിക രോഗങ്ങളെ തടയുന്നു. ഓർമ്മശക്തി മെച്ചപ്പെടുത്തുകയും അൽഷിമേഴ്സ് രോഗ സാധ്യത കുറയ്ക്കുന്നതിനും ബ്ലാക്ക് റൈസ് സഹായിക്കുന്നു.
- കണ്ണിന്റെ ആരോഗ്യത്തിനും കറുത്ത അരി സഹായിക്കുന്നു. ലൂട്ടെയ്ൻ, സിയാസാന്തിൻ എന്നിങ്ങനെ രണ്ട് തരത്തിലുള്ള കരോറ്റെനോഡുകൾ ഇതിൽ അടങ്ങിയിരിക്കുന്നു. ഇത് കണ്ണിന്റെ ആരോഗ്യത്തിന് സഹായിക്കുന്നു. അണുബാധകളിൽ നിന്നും ഇവ സംരക്ഷണം നൽകുന്നു.
