കണ്ടാൽ കുരുമുളക്, എന്നാൽ ​ഗുണങ്ങളിൽ ഒരുപിടി മുൻപിൽ; ഈ ഔഷധ സസ്യത്തെ ഒന്നറിഞ്ഞ് വെച്ചോളൂ; ​കാര്യമുണ്ട്..

ഔഷധ ​ഗുണങ്ങളേറെയുള്ള സസ്യമാണ് തിപ്പലി. കുരുമുളകിനോ‌ട് സാമ്യമുള്ള ചെടിയാണിത്. തിരികളിലാണ് കായ്കൾ ഉണ്ടാകുക. ഇത് വിളഞ്ഞു പാകമാകുന്നതോടെ കറുത്ത നിറത്തിലായി തീരുന്നു. ഇതുണക്കിയെടുക്കുന്നതാണ് ഔഷധയോഗ്യമായ ഭാഗം. പലതരം തിപ്പലികളുണ്ട്. ചെറുതിപ്പലി, വൻതിപ്പലി, നീർതിപ്പലി, ഹസ്തിതിപ്പലി, കുഴിതിപ്പലി, കാട്ടുതിപ്പലി, ഉണ്ടതിപ്പലി തുടങ്ങിയവ അവയിൽ ചിലതാണ്. ആയൂർവേദത്തിൽ ഒഴിച്ചുകൂടാനാകാത്ത ഒന്നാണ് തിപ്പലി.

ഭക്ഷണത്തിൽ ഉൾപ്പെടുത്തുന്ന സു​ഗന്ധ വ്യഞ്ജനമാണ് തിപ്പലി. ഔഷധ സസ്യങ്ങളുടെ കൂട്ടത്തിലെ രാജ്ഞി എന്നാണ് ഇത് അറിയപ്പെടുന്നത്. ഭക്ഷണത്തിന് എരിവും രുചിയും നൽകാൻ ഇതിന് കഴിയുന്നു. ഇതിന് പുറമേ നി​രവധി ​ഗുണങ്ങളാണ് ഇത് നൽകുന്നത്. അവയിൽ ചിലത് ഇതാ..‌

1) മെച്ചപ്പെട്ട ദഹനം

ദഹനം മെച്ചപ്പെടുത്താൻ പണ്ട് കാലം മുതൽക്കേ തിപ്പലി ഉപയോ​ഗിക്കുന്നു. ദഹന എൻസൈമുകളുടെയും പിത്തരസത്തിന്റെയും ഉൽപാദനത്തെ ഉത്തേജിപ്പിക്കുന്നതിനും ദഹനക്കേട്, മലബന്ധം, ​ഗ്യാസ്, വയറുവീർക്കൽ തുടങ്ങിയവ ലഘൂകരിക്കുന്നതിന് സഹായിക്കുന്നു.

2) ശ്വാസകോശ സംരക്ഷണത്തിന് ‌

ശ്വാസകോശത്തിന്റെ ആരോ​ഗ്യത്തിന് മെച്ചപ്പെട്ട മാർ​ഗമാണ് തിപ്പലി. ശരീരത്തെ ചൂടാക്കാൻ കഴിവുള്ളവയാണ് തിപ്പലി. ഇത് കഴിക്കുന്നതിലൂടെ ശ്വസനം എളുപ്പമാക്കാനും ശ്വാസകോശ സംബന്ധമായ അവസ്ഥകളിൽ നിന്ന് ആശ്വാസം ലഭിക്കുകയും ചെയ്യുന്നു. ജലദോഷം, പനി തുടങ്ങിയവയെ പ്രതിരോധിക്കാനും തിപ്പലി നല്ലതാണ്. ‌

3) വേ​ദന സംഹാരി

സന്ധിവാതം, തലവേദന, പേശി വേദന തുടങ്ങിയ വേദനകളിൽ നിന്ന് ആശ്വാസം നൽകാൻ തിപ്പലിക്ക് കഴിയും. ആൻറി-ഇൻഫ്ലമേറ്ററി ​ഗുണങ്ങൾ വീക്കം കുറയ്‌ക്കുന്നു.

4) പ്രതിരോധശേഷി മെച്ചപ്പെടുത്താൻ

ആന്റിഓക്‌സിഡന്റുകളാൽ സമ്പന്നമായ തിപ്പലി, രോ​ഗ പ്രതിരോധ സംവിധാനത്തെ മെച്ചപ്പെടുത്തുന്നു.പതിവായി ഉപയോ​ഗിക്കുന്നത് ‌‌‌‌അണുബാധയ്‌ക്കുള്ള സാധ്യതയും കുറയ്‌ക്കുന്നു.

5) ദന്താരോ​ഗ്യത്തിന്

തിപ്പലിയു‌‌ടെ ആൻറി ബാക്ടീരിയൽ ഗുണങ്ങൾ വായുടെ ആരോഗ്യത്തെ കാക്കുന്നു. വായ് നാറ്റത്തെ ചെറുക്കാനും മോണയുടെ വീക്കം കുറയ്‌ക്കാനും ഇത് നല്ലതാണ്. പല്ലുകളെ ശക്തിപ്പെടുത്താനും പണ്ട് മുതലേ തിപ്പലി ഉപയോ​ഗിക്കുന്നു.

6) ലൈംഗികരോ​ഗ്യത്തിന്

പ്രത്യുൽപാദന ആരോഗ്യം മെച്ചപ്പെടുത്തുന്നതിനും ലൈംഗികരോ​ഗ്യവുമായി ബന്ധപ്പെട്ട പ്രശ്നങ്ങൾ പരിഹരിക്കുന്നതിനും തിപ്പലി നല്ലതാണ്. പ്രസവരക്ഷയ്‌ക്കും തിപ്പലി ഉപയോ​ഗിക്കുന്നു. തിപ്പലിയും ഉണക്ക മുന്തിരിയും ചേർത്ത് പൊടിച്ച് കഴിക്കുന്നതിലൂടെ ദഹനശക്തിയും ധാതുപുഷ്ടിയും ലഭിക്കുമെന്ന് ആരോ​ഗ്യവിദ​ഗ്ധർ പറയുന്നു.

7) അർബുദത്തെ തടയാൻ

കാൻസർ മുഴകളിൽ കാണപ്പെടുന്ന എൻസൈമിന്റെ ഉത്പാദനത്തെ തടയാൻ തിപ്പലിക്ക് കഴിയുമെന്നാണ് പഠനങ്ങൾ പറയുന്നത്. തിപ്പലിയിൽ അടങ്ങിയിട്ടുള്ള പിപ്പർലോം​ഗ്യുമിൻ എന്ന രാസവസ്തുവാണ് ഇതിന് സഹായിക്കുന്നത്.