ചൂടിനോട് ഇനി വിടപറയാം; ഉണർവിനും ഉന്മേഷത്തിനും വെള്ളരിക്ക സംഭാരം പരീക്ഷിച്ചോളൂ..

ഉരുകിയൊലിക്കുന്ന വേനൽക്കാലത്തിലൂടെയാണ് നാം കടന്നുപോകുന്നത്. ഫാൻ ഇട്ടിരുന്നാലും എസി ഇട്ടിരുന്നാലും ചൂടിന് ശമനമില്ലെന്നു മാത്രമല്ല നിർജ്ജലീകരണം സംഭവിക്കുന്ന അവസ്ഥ കൂടിയാണുള്ളത്. ഈ സമയങ്ങളിൽ ധാരാളം ഫലവർഗങ്ങളും ജലാംശം അടങ്ങിയ ഭക്ഷണങ്ങളും കഴിക്കണമെന്നാണ് വിദഗ്ധരുടെ നിർദേശം. ശരീരം തണുപ്പിക്കാൻ ഉത്തമമാണ് വെള്ളരിക്കയും തൈരും. ധാരാളം പോഷകഗുണങ്ങൾ അടങ്ങിയ വെള്ളരിക്ക വെറുതെ കഴിക്കുന്നത് പോലും കണ്ണുകൾക്ക് തണുപ്പേകുന്നതിനും ദഹനം മെച്ചപ്പെടുത്തുന്നതിനും സഹായിക്കുന്നു. ചൂടുകാലത്ത് വെള്ളരിക്ക സ്ഥിരമായി കഴിക്കുന്നത് ശരീരം തണുപ്പിച്ച് ചൂടുകുരു പോലുള്ള പ്രശ്‌നങ്ങൾ വരുന്നത് ഒഴിവാക്കാനും സഹായിക്കുന്നതാണ്. ചൂടിൽ നിന്നും ശമനമേകാൻ ഇനി വെള്ളരിക്ക സംഭാരവും കുടിച്ചു നോക്കാം..

ചേരുവകൾ

തൊലി കളഞ്ഞെടുത്ത വെള്ളരിക്ക- 1 കപ്പ്

ഇഞ്ചി- ചെറിയ കഷണം

പച്ചമുളക്- 2 എണ്ണം

മല്ലിയില അരിഞ്ഞത്- 1 ടീസ്പൂൺ

തൈര്- 1 കപ്പ്

കറിവേപ്പില- ആവശ്യത്തിന്

ഉപ്പ്- ആവശ്യത്തിന്

വെള്ളം- 2 കപ്പ്

തയ്യാറാക്കുന്ന വിധം

വെള്ളരിക്ക അരിഞ്ഞത്, ഇഞ്ചി, പച്ചമുളക്, കറിവേപ്പില, മല്ലിയില, ഉപ്പ് എന്നിവ നന്നായി അടിച്ചെടുക്കുക. ഇതിലേക്ക് തൈരും ആവശ്യത്തിന് വെളളവും ചേർത്ത് നന്നായി ഇളക്കുക. ആവശ്യമെങ്കിൽ ഐസ് ക്യൂബുകളും ചേർത്ത് കൊടുക്കാം. മുകളിൽ ഒരു കഷണം പച്ചമുളകോ കുറച്ച് കറിവേപ്പിലയോ ഇട്ടതിന് ശേഷം ഇത് കുടിക്കാം.