ന്യൂഡൽഹി: വാർത്തകൾ ലോകത്തെ അറിയിക്കാൻ പുത്തൻ പ്ലാറ്റ്ഫോമുമായി പ്രസാർ ഭാരതി. വാർത്താ സ്ഥാപനങ്ങളായ പത്രങ്ങൾ, മാഗസിനുകൾ, വാർത്താ ചാനലുകൾ, ഡിജിറ്റൽ ന്യൂസ് പബ്ലിഷേഴ്സ് എന്നിവർക്ക് വാർത്ത പങ്കിടാൻ അനുവദിക്കുന്ന സംവിധാനമാണ് സജ്ജമാക്കിയിരിക്കുന്നത്. പ്രസാർഭാരതിയുടെ ,500 റിപ്പോർട്ടർമാരുടെയും സ്ട്രിംഗർമാരുടെയും ശൃംഖലയാകും വിവിധ ഫോർമാറ്റുകളിലുള്ള വാർത്തകൾ പങ്കിടുക.
PB-ഷെയർഡ് ഓഡിയോ-വിഷ്വൽസ് (PB-SHABD) എന്നാണ് പ്ലാറ്റ്ഫോം അറിയപ്പെടുക. വാർത്താ പ്രാധാന്യമുള്ള ഓഡിയോ, വീഡിയോ, ടെക്സ്റ്റ്, ഫോട്ടോകൾ തുടങ്ങിയവ ഇതിലൂടെ ലഭ്യമാകും. രജിസ്റ്റർ ചെയ്ത സ്ഥാപനങ്ങൾക്ക് ആദ്യത്തെ ഒരു വർഷം സേവനം സൗജന്യമായിരിക്കുമെന്ന് കേന്ദ്ര ഇൻഫർമേഷൻ ആൻഡ് ബ്രോഡ്കാസ്റ്റിംഗ് മന്ത്രി അനുരാഗ് ഠാക്കൂർ അറിയിച്ചു.
റിപ്പോർട്ടർമാരുടെ വമ്പൻ ശൃംഖലയാണ് പ്രസാർ ഭാരതിക്കുള്ളതെന്ന് പ്രസാർ ഭാരതിയുടെ ചീഫ് എക്സിക്യൂട്ടീവ് ഓഫീസർ (സിഇഒ) ഗൗരവ് ദ്വിവേദി പറഞ്ഞു. ആയിരക്കണക്കിന് വാർത്തകളാണ് പ്രതിദിനം ലഭിക്കുന്നത്. എന്നാൽ നിർഭാഗ്യവശാൽ അവയെല്ലാം തങ്ങൾക്ക് സംപ്രേഷണം ചെയ്യാൻ കഴിയുന്നില്ല, പ്രത്യേകിച്ച് പ്രാദേശിക താത്പര്യമുള്ള വാർത്തകൾ. ഇതിന് പിന്നാലെയാണ് ഇത്തരത്തിലൊരു ആശയം ഉടടലെടുത്തതെന്നും അദ്ദേഹം പറഞ്ഞു. SHABD പ്ലാറ്റ്ഫോമിൽ വാർത്താ സ്ഥാപനങ്ങൾക്ക് സ്വന്തം ലോഗോ ഉപയോഗിച്ച് ഉള്ളടക്കം പങ്കുവയ്ക്കാം.
യൂട്യൂബിലോ മറ്റൊരു സോഷ്യൽ മീഡിയ വെബ്സൈറ്റിലോ ഉള്ള ഒരു പത്രപ്രവർത്തകൻ പ്രസാർ ഭാരതിയുടെ ഫീഡ് ഉപയോഗിക്കാൻ ആഗ്രഹിക്കുന്നുവെങ്കിൽ ഇൻഫർമേഷൻ ടെക്നോളജിക്ക് കീഴിൽ MIB നിയമം 2021 പ്രകാരം ആദ്യം അവരുടെ വിവരങ്ങൾ നൽകണം. രജിസ്റ്റർ ചെയ്യാത്ത ഒരു പത്രപ്രവർത്തകൻ പ്രസാർ ഭാരതിയുടെ ഉള്ളടക്കം ഉപയോഗിക്കുന്നുവെങ്കിൽ പകർപ്പ് അവകാശം സംബന്ധിച്ച നോട്ടീസ് ലഭിക്കും.
