ചെന്നൈ: വീണ്ടും ആത്മീയ യാത്രയ്ക്കൊരുങ്ങി നടൻ രജനീകാന്ത്. ചെന്നൈയിൽ നിന്നും വിമാന മാർഗം രജനീകാന്ത് ഉത്തരാഖണ്ഡിലെ ഡെറാഡൂണിലെത്തി. കേദാർനാഥ്, ബദരീനാഥ് ക്ഷേത്രങ്ങളിലും അദ്ദേഹം ദർശനം നടത്തും. അബുദാബിയിലെ BAPS ഹിന്ദു ക്ഷേത്രത്തിൽ ദർശനം നടത്തിയ ശേഷം അടുത്തിടെയാണ് താരം തിരികെ ചെന്നൈയിലെത്തിയത്.
സിനിമാ തിരക്കുകൾ മാറ്റി വച്ചാണ് രജനീകാന്ത് തന്റെ ആത്മീയ യാത്രക്ക് തിരിച്ചത്. എല്ലാ വർഷവും അദ്ദേഹം കേദാർനാഥും ബദരീനാഥും സന്ദർശിക്കാറുണ്ട്. യാത്രാ മദ്ധ്യേ മാധ്യമങ്ങളോട് തന്റെ യാത്രയെപ്പറ്റി അദ്ദേഹം മനസ് തുറന്നു. ‘എല്ലാ വർഷവും ആത്മീയ യാത്ര വീണ്ടും തുടരാൻ പ്രേരിപ്പിക്കുന്ന പുതിയ അനുഭവങ്ങൾ എനിക്ക് ലഭിക്കും. ഇത്തവണയും പുതിയ അനുഭവങ്ങൾ ലഭിക്കുമെന്ന് ഞാൻ വിശ്വസിക്കുന്നു”-രജനീകാന്ത് പറഞ്ഞു.
ടി ജെ ജ്ഞാനവേൽ സംവിധാനം ചെയ്ത ‘വേട്ടയാൻ’ ആണ് രജനികാന്തിന്റെ ചിത്രീകരണം പൂർത്തിയായ സിനിമ. അമിതാഭ് ബച്ചനും സിനിമയിൽ പ്രധാന വേഷം ചെയ്യുന്നു. ഫഹദ് ഫാസിൽ, മഞ്ജുവാര്യർ തുടങ്ങിയ മലയാളി താരങ്ങളും സിനിമയിലുണ്ട്. രജനികാന്തിന്റെ 170-ാമത്തെ ചിത്രമാണ് വേട്ടയാൻ. ചിത്രം ഈ വർഷം ഒക്ടോബറിൽ റിലീസ് ചെയ്യുമെന്നാണ് പ്രതീക്ഷിക്കുന്നത്.
