കൽപ്പറ്റ: വയനാട് ഉരുൾപൊട്ടലിൽ ദുരന്തബാധിതരുടെ പുനരധിവാസത്തിനുൾപ്പെടെ കേന്ദ്രസർക്കാരിന്റെ എല്ലാ പിന്തുണയും സഹായവും ഉണ്ടാകുമെന്ന് പ്രധാനമന്ത്രി നരേന്ദ്രമോദി അറിയിച്ചതായി മന്ത്രി എകെ ശശീന്ദ്രൻ. പ്രധാനമന്ത്രി ഡൽഹിയിലേക്ക് മടങ്ങിയ ശേഷം മാദ്ധ്യമങ്ങളോട് സംസാരിക്കുകയായിരുന്നു വയനാടിന്റെ ചുമതല കൂടിയുളള വനം മന്ത്രി.
വിശദമായ കാര്യങ്ങൾ എത്രയും പെട്ടന്ന് പ്രധാനമന്ത്രിയുടെ ഓഫീസിൽ സമർപ്പിക്കണം. അതാണ് ഇനി ഞങ്ങളുടെ ഉത്തരവാദിത്വം. കേന്ദ്രവും സംസ്ഥാനവും ജനങ്ങളും സഹകരിച്ച് ഈ ശ്രമകരമായ ദൗത്യം പൂർത്തിയാക്കാനും പ്രതിസന്ധിയെ അതിജീവിക്കാനും കഴിയുമെന്ന പ്രത്യാശ കൂടുതൽ ഉറപ്പിക്കുന്ന ചർച്ചകളാണ് ഉണ്ടായതതെന്ന് മന്ത്രി പറഞ്ഞു.
ഞങ്ങളെപ്പോലുളളവർക്ക് കൂടുതൽ കർമ്മനിരതമായി പ്രവർത്തിക്കാനുളള ആവേശവും പ്രധാനമന്ത്രിയുടെ സന്ദർശനം നൽകുന്നുണ്ടെന്ന് അദ്ദേഹം കൂട്ടിച്ചേർത്തു. കേരളത്തിന്റെ പ്രതീക്ഷയെ സാധൂകരിക്കുന്ന രീതിയിലുളള പ്രതികരണമാണ് പ്രധാനമന്ത്രിയിൽ നിന്നും ഉണ്ടായത്. എല്ലാ കാര്യവും ചെയ്യാൻ കേന്ദ്ര പങ്കാളിത്തം ഉണ്ടാകുമെന്നാണ് അദ്ദേഹം പറഞ്ഞതെന്നും എകെ ശശീന്ദ്രൻ പറഞ്ഞു.
രാവിലെയാണ് പ്രധാനമന്ത്രി നരേന്ദ്രമോദി ദുരന്തമേഖലയിൽ എത്തിയത്. കണ്ണൂരിൽ നിന്ന് ഹെലികോപ്ടറിൽ വയനാട്ടിലെത്തിയ അദ്ദേഹം ചൂരൽമലയിലും ബെയ്ലി പാലത്തിലുമൊക്കെ സന്ദർശനം നടത്തി ദുരന്തത്തിന്റെ ആഴം നേരിട്ട് മനസിലാക്കി. വിംസ് ആശുപത്രിയിൽ ഉൾപ്പെടെ ദുരന്തബാധിതരുമായി അദ്ദേഹം സന്ദർശിച്ചു. രാവിലെ 11 മണിക്ക് എത്തിയ അദ്ദേഹം വൈകിട്ട് 5.45 ഓടെയാണ് ഡൽഹിയിലേക്ക് മടങ്ങിയത്.
