അഭിനയത്തിൽ കൂടുതൽ എന്തെങ്കിലും പഠിക്കാൻ അഭിനയ കളരികൾ നടത്തണമെന്ന് നടൻ മമ്മൂട്ടി. അമ്മ സംഘടനയുടെ മീറ്റിങ്ങിൽ സംസാരിക്കുകയായിരുന്നു അദ്ദേഹം. അഭിനയത്തിൽ ആത്മവിശ്വാസം കൂടണമെങ്കിൽ പുതുതായി എന്തെങ്കിലും പഠിക്കണമെന്നും പണ്ട് മൂന്നുദിവസം ശിബിരം പോലെ അഭിനയക്കളരി നടത്താൻ ആഗ്രഹമുണ്ടായിരുന്നുവെന്നും താരം പറഞ്ഞു.
“അഭിനയ കളരികൾ നടത്തണമെന്ന് പറയുന്നതിന് കാരണമുണ്ട്. നമ്മുടെ കയ്യിൽ ഉള്ളതാണ് നമ്മൾ ഇപ്പോൾ ഇടുന്നത്. കുറച്ചുകൂടി പിടിച്ചെടുത്താൽ കുറേക്കാലം കൂടി കൊണ്ടു പോകാൻ പറ്റും. പുറത്തുനിന്നും കൂടുതൽ പഠിക്കുന്നത് നല്ലതാണ്. എല്ലാം അറിയാം എന്നുള്ള ആത്മവിശ്വാസത്തിലാണ് നമ്മൾ പോകുന്നത്. ആ ആത്മവിശ്വാസത്തിന് ആക്കം കൂട്ടാൻ പലരുടെയും അനുഭവങ്ങൾ, പലരുടെയും രീതികൾ, നമുക്കറിയാത്ത ടെക്നിക്കുകൾ, കൂടുതൽ കാര്യങ്ങൾ പറഞ്ഞു തരാൻ ആൾക്കാർ ഉണ്ടെങ്കിൽ അതെല്ലാം നല്ലതാണ്. അങ്ങനെയെങ്കിൽ അഭിനയം കുറച്ചുകൂടി ശക്തമാകും”.
“പണ്ട് മൂന്നുദിവസം ഒരു ശിബിരം പോലെ നടത്തി അഭിനയം പഠിക്കാൻ തീരുമാനിച്ചിരുന്നു. എന്നാൽ അന്ന് പലർക്കും അതിനൊന്നും താല്പര്യമില്ല. കാരണം അന്ന് ഉണ്ടായിരുന്നവർ എല്ലാം പഠിച്ചുകഴിഞ്ഞവരാണ്. എന്നാൽ എന്നെപ്പോലെ ഉള്ളവർക്ക് ഇനിയും എന്തെങ്കിലും പുതിയത് പഠിച്ചെങ്കിൽ മാത്രമേ നിലനിൽക്കാൻ കഴിയൂ. കാരണം, പുതിയ പിള്ളേർ പുതിയ ടെക്നിക്കുമായി ഇറങ്ങിയിരിക്കുകയാണ്. അവരുടെ മുന്നിൽ പിടിച്ചു നിൽക്കണമെങ്കിൽ നമ്മൾ വേറെ ടെക്നിക്ക് ഇറക്കണം. നമ്മൾ അവർ ചെയ്യുന്നതുപോലെ ചെയ്തിട്ട് കാര്യമില്ല. അവർ ചെയ്യാത്തത് നമ്മൾ ചെയ്യണം”-മമ്മൂട്ടി പറഞ്ഞു.
