തിരുവനന്തപുരം: കെഎസിഎല്‍ ബ്രാന്‍ഡ് അംബസിഡറായ ചലച്ചിത്രതാരം മോഹന്‍ലാല്‍ നാളെ തലസ്ഥാനത്ത്. കേരള ക്രിക്കറ്റ് ലീഗിന്റെ ലോഞ്ചിംഗ് നിർവഹിക്കാനാണ് സൂപ്പർ താരമെത്തുന്നത്. ഉച്ചയ്‌ക്ക് 12ന് ഹയാത്ത് റീജന്‍സിയിലാണ് ചടങ്ങ്. ക്രിക്കറ്റ് ലീഗിനായി തയാറാക്കിയ ഗാനവും നാളെ പുറത്തിറക്കും. ചാമ്പ്യന്മാർക്കുള്ള ട്രോഫി കായിക വകുപ്പു മന്ത്രി വി അബ്ദുറഹിമാന്‍ അനാവരണം ചെയ്യും.
ആറു ടീമുകളുടേയും ഫ്രാഞ്ചൈസി ഉടമകള്‍ക്ക് മോഹന്‍ലാല്‍ മെമന്റോ സമ്മാനിക്കും. ഓരോ ടീമുകളിലേയും കളിക്കാരേയും പരിചയപ്പെടും.കെസിഎ പ്രസിഡന്റ് ജയേഷ് ജോര്‍ജ് അദ്ധ്യക്ഷത വഹിക്കും. സെക്രട്ടറി വിനോദ് എസ് കുമാര്‍, കേരള ക്രിക്കറ്റ് ലീഗ് ചെയര്‍മാന്‍ നാസര്‍ മച്ചാന്‍ എന്നിവര്‍ പങ്കെടുക്കും. പ്രത്യേക ക്ഷണിതാക്കള്‍ക്ക് മാത്രമാണ് ചടങ്ങിലേക്ക് പ്രവേശനം അനുവദിക്കുക.
ബേസില്‍ തമ്പി (കൊച്ചി ബ്ലൂടൈഗേഴ്‌സ്), മുഹമ്മദ് അസറുദ്ദീന്‍ (ആലപ്പി റിപ്പിള്‍സ്), സച്ചിന്‍ ബേബി (ഏരീസ് കൊല്ലം സെയ്ലേഴ്‌സ്), റോഹന്‍ എസ്. കുന്നുമ്മേല്‍ (കാലിക്കറ്റ് ഗ്ലോബ്സ്റ്റാര്‍സ്), വരുണ്‍ നായനാര്‍ (തൃശൂര്‍ ടൈറ്റന്‍സ്), അബ്ദുള്‍ ബാസിത് (ട്രിവാന്‍ഡ്രം റോയല്‍സ്) എന്നിവരാണ് ക്യാപ്റ്റന്മാർ.
