തട്ടിനോക്കി, അനങ്ങുന്നില്ല; ഉണർത്താൻ ശ്രമിച്ച് തളർന്നു, കുട്ടിയാനയുടെ ജഡം തുമ്പിക്കയ്യിലേന്തി അമ്മയാന; ഉള്ളുലച്ച് വീഡിയോ

ആനക്കുട്ടിയുടെ ചേതനയറ്റ ശരീരം തുമ്പിക്കയ്യിലെടുത്ത് കൂടെ കൊണ്ടുപോകുന്ന ഒരു അമ്മയാനയുടെ ഹൃദയഭേദകമായ വീഡിയോ ആണ് സോഷ്യൽ മീഡിയയിൽ പ്രചരിക്കുന്നത്. മകൻ മരിച്ചെന്ന് മനസിലാക്കാൻ പാടുപെടുന്ന അമ്മയാനയുടെ ശ്രമങ്ങൾ കണ്ടിരിക്കുന്നവരുടെയും കണ്ണിനെ ഈറനണിയിക്കും. മനുഷ്യരെപ്പോലെ മൃഗങ്ങൾക്കിടയിലുമുള്ള അഗാധമായ വൈകാരിക അടുപ്പമാണ് ഈ അമ്മയാനയുടെയും കുട്ടിയാനയുടെയും വീഡിയോയിലുള്ളത്.

പ്രശസ്ത ഐഎഫ്എസ് ഉദ്യോഗസ്ഥനായ പ്രവീൺ കസ്വാനാണ് വീഡിയോ എക്‌സിൽ പങ്കിട്ടത്. വൈകാരികമായ കുറിപ്പോടെയാണ് അദ്ദേഹം വീഡിയോ പോസ്റ്റ് ചെയ്തത്. “കുട്ടിയാന മരിച്ചുവെന്ന് അമ്മയാനക്ക് ഇനിയും മനസിലാക്കാനായിട്ടില്ല. ദിവസങ്ങളോളം അവൾ തന്റെ മരിച്ച മകനൊപ്പം കിടന്നു. ശരീരം തുമ്പിക്കയ്യിലെടുത്ത് കൊണ്ടുപോകുന്നു, തട്ടി വിളിക്കുന്നത് തുടരുന്നു. അവർ നമ്മളെപ്പോലെയാണ്, നമ്മളെക്കാൾ മനുഷ്യത്വമുള്ളവരാണ്,” പ്രവീൺ കുറിച്ചു.

ഇത് ആദ്യത്തെ സംഭവമില്ലെന്നാണ് അദ്ദേഹം പറയുന്നത്. തന്റെ പ്രവർത്തന മേഖലയിൽ ഇതുപോലെ നിരവധി അനുഭവങ്ങൾ നേരിട്ട് കണ്ടിട്ടുണ്ടെന്ന് പ്രവീൺ പറഞ്ഞു. ചിലപ്പോൾ അമ്മയാന മാത്രമായിരിക്കില്ല. ഒരു കൂട്ടം ആനകൾ ഇത്തരത്തിൽ ചത്ത ആനകുട്ടികൾക്ക് കാവലിരിക്കും. അവരെയും വഹിച്ചുകൊണ്ട് സഞ്ചരിക്കും. ഇത് ആനകൾക്കിടയിലെ ഒരു ശവസംസ്കാര ഘോഷയാത്രപോലെ തോന്നിക്കുമെന്നും പ്രവീൺ കസ്വാൻ പറഞ്ഞു.160,000 ആളുകളാണ് വീഡിയോ കണ്ടത്.

#Elephant Mother not able to comprehend death of her calf. She keeps dragging body for some time – at times for days. They are so like us – they are so humane. pic.twitter.com/qmWBjLZud8

— Parveen Kaswan, IFS (@ParveenKaswan) November 21, 2024