റിപ്പബ്ലിക് ദിന പരേഡിന് സാക്ഷ്യം വഹിക്കാൻ 22 മലയാളികളും. രാജ്യത്തിന്റെ വിവിധ ഭാഗങ്ങളിൽ നിന്ന് ക്ഷണിക്കപ്പെട്ട 10,000 പ്രത്യേക അതിഥികളിലാണ് കേരളത്തിൽ നിന്നുള്ള 22 പേരും ഉൾപ്പെട്ടത്. പാലക്കാട് തോൽപ്പാവക്കൂത്ത് കലാകാരൻ രാമചന്ദ്ര പുലവർ, വയ്‌ക്കോൽ കൊണ്ട് ചിത്രം രചിക്കുന്ന കൊല്ലം സ്വദേശി ബി.രാധാകൃഷ്ണ പിള്ള, എറണാകുളം സ്വദേശി പി.എ.ശശിധരൻ എന്നിവർക്ക് ഉൾപ്പെടെയാണ് ക്ഷണം ലഭിച്ചത്.
പ്രധാനമന്ത്രി യശസ്വി പദ്ധതിയുടെ കീഴിൽ 13 പേർ, തുണിത്തരങ്ങൾ (കരകൗശലം) വിഭാഗത്തിൽ നിന്ന് മൂന്ന് പേർ , വനിതാ ശിശു വികസന വിഭാഗത്തിൽ നിന്ന് ആറ് പേർ എന്നിങ്ങനെയാണ് തെരഞ്ഞെടുത്ത വിഭാഗങ്ങളുടെ പട്ടികയിൽ ഉൾപ്പെട്ടവർ.
റിപ്പബ്ലിക്ക് ദിനാഘോഷങ്ങൾക്ക് പുറമേ ഇവർക്ക് ദേശീയ യുദ്ധസ്മാരകം, പിഎം സംഗ്രഹാലയ, ഡൽഹിയിലെ മറ്റു പ്രമുഖ സ്ഥലങ്ങൾ എന്നിവ സന്ദർശിക്കാനും മന്ത്രിമാരുമായി സംവദിക്കാനുള്ള അവസരവും ലഭിക്കും.
