കാസര്കോട്: കാസര്കോട് നാലര വയസുക്കാരിക്ക് പാമ്പിന്റെ കടിയേറ്റു. മൂര്ഖനാണ് കുട്ടിയെ കടിച്ചത്. കളിച്ചുകൊണ്ടിരിക്കുകയായിരുന്നു കുട്ടി. കുട്ടിയെ പരിയാരം മെഡിക്കല് കോളേജ് ഐസിയുവില് പ്രവേശപ്പിച്ചു. നില അതീവ ഗുരുതരമാണ്. എടപ്പാള് ചിറക്കല് സ്വദേശിനി ഷഹല തസ്നി (21) പാമ്പ് കടിയേറ്റ് അബോധാവസ്ഥയില് സ്വകാര്യ ആശുപത്രിയില് ചികിത്സയിലാണ്. കാല്പാദത്തിലാണ് ഷഹലയ്ക്ക് കടിയേറ്റത്.
മുണ്ടക്കുറ്റിയിലെ രമേശിന്റെ വീടിനുള്ളില് നിന്ന് അഞ്ച് ശങ്കുവരയന് പാമ്പുകളെയാണ് കണ്ടെത്തിയത്. ആറ് വയസ്സുള്ള മകള് ഉറങ്ങിയ മുറിയിലെ കട്ടിലിനോട് ചേര്ന്നാണ് ആദ്യം പാമ്പിനെ കണ്ടത്. തുടര്ന്ന് നടത്തിയ പരിശോധനയില് ശുചിമുറിയിലും അടുക്കളയിലുമായി മറ്റ് നാല് പാമ്പുകളെ കൂടി പിടികൂടി. വേനല് കടുത്തതോടെ തണുപ്പ് തേടി പാമ്പുകള് വീടിനുള്ളിലേക്ക് കയറുന്നതാണ് അപകടങ്ങള് വര്ധിക്കാന് കാരണം.
പേരാമ്പ്ര കണ്ണിപ്പൊയിലില് അഞ്ജലിക്കും പുനൂര് സ്വദേശി അന്സാറിനും സ്വന്തം കിടപ്പുമുറിയില് വെച്ചാണ് പാമ്പ് കടിയേറ്റത്. ശങ്കുവരയന് പാമ്പുകളാണ് ഇരുവരെയും ആക്രമിച്ചത്. ഇവര് കോഴിക്കോട് മെഡിക്കല് കോളേജില് ചികിത്സയിലാണ്. പുല്ല് പറിക്കുന്നതിനിടെ കാറളം സ്വദേശിനി പ്രസീതയ്ക്കും, കിണര് ജോലിക്കിടെ നടവരമ്പ് സ്വദേശി സനീഷിനും കടിയേറ്റു. ചിറയന്കീഴ് സ്വദേശി ഭുവനചന്ദ്രനും പാമ്പ് കടിയേറ്റ് ചികിത്സ തേടി.
കണ്ണൂര് താഴെ ചൊവ്വയിലെ ഒരു പഴക്കടയില് നിന്നും കോഴിക്കോട് കാരശ്ശേരിയിലെ വീട്ടുപറമ്പില് നിന്നും ഭീമന് മൂര്ഖന് പാമ്പുകളെ പിടികൂടി. വീടിന് ചുറ്റുമുള്ള കാടുകള് വെട്ടിത്തെളിക്കാനും, ജനലുകളും വാതിലുകളും കൃത്യമായി അടയ്ക്കാനും അധികൃതര് നിര്ദ്ദേശിക്കുന്നു. രാത്രിയില് തറയില് കിടന്നുറങ്ങുന്നത് ഒഴിവാക്കണമെന്നും പാമ്പ് കടിയേറ്റാല് എത്രയും വേഗം ആന്റി വെനം ലഭ്യമായ ആശുപത്രികളില് എത്തിക്കണമെന്നും ആരോഗ്യവകുപ്പ് ഓര്മ്മിപ്പിച്ചു. ടൈല് വിട്ട വീടുകളില് പോലും വിള്ളലുകളിലൂടെയോ വാതിലിനടിയിലൂടെയോ പാമ്പുകള് എത്താന് സാധ്യതയുള്ളതിനാല് അതീവ ജാഗ്രത പാലിക്കുക.
