ധാക്ക: ചലിച്ചുകൊണ്ടിരുന്ന ട്രെയിനിനും പ്ലാറ്റ്ഫോമിനും ഇടയിലെ മരണഗര്‍ത്തത്തിലേക്ക് വീണുപോയ പിഞ്ചുകുഞ്ഞിനെ സ്വന്തം ജീവന്‍ പണയപ്പെടുത്തി രക്ഷിച്ച് ഒരു പിതാവ്. ബംഗ്ലാദേശിലെ റെയില്‍വേ സ്റ്റേഷനില്‍ അരങ്ങേറിയ ഈ സംഭവത്തിന്റെ ദൃശ്യങ്ങള്‍ അവിശ്വസനീയതയോടെയും ആദരവോടെയുമാണ് ലോകം നോക്കിക്കാണുന്നത്. ബംഗ്ലാദേശിലെ ടിറ്റാസ് കമ്മ്യൂട്ടര്‍ ട്രെയിനില്‍ യാത്ര ചെയ്യുകയായിരുന്നു ഈ കുടുംബം. ഒന്നര മണിക്കൂറോളം വൈകിയോടിയ ട്രെയിന്‍ സ്റ്റേഷനില്‍ നിന്ന് നീങ്ങിത്തുടങ്ങിയ ശേഷമാണ് ഇവര്‍ പുറത്തിറങ്ങാന്‍ ശ്രമിച്ചത്. ഈ വെപ്രാളത്തിനിടയില്‍ പിതാവിന്റെ കൈയില്‍ നിന്നും കുട്ടി പാളത്തിലേക്ക് വഴുതിവീഴുകയായിരുന്നു.
A little boy who jumped onto the train tracks in Bangladesh was rescued at the last moment by his father. pic.twitter.com/wi7GwQnjN7
— 1880 News (@1880News) April 30, 2026
അപകടം കണ്‍മുന്നില്‍ കണ്ട പിതാവ് മറ്റൊന്നും ആലോചിക്കാതെ കുതിച്ചുനീങ്ങുന്ന ട്രെയിനിനടിയിലേക്ക് എടുത്തുചാടി. കുട്ടിയെ തന്റെ ശരീരത്തിനടിയില്‍ ചേര്‍ത്തുപിടിച്ച് അദ്ദേഹം പാളത്തില്‍ മലര്‍ന്നു കിടന്നു. ട്രെയിനിന്റെ ബോഗികള്‍ ഒന്നിനുപുറകെ ഒന്നായി അവര്‍ക്ക് മുകളിലൂടെ കടന്നുപോകുമ്പോഴും കുഞ്ഞിന് പോറലേറ്റില്ലെന്ന് അദ്ദേഹം ഉറപ്പുവരുത്തി. പരിഭ്രമിച്ച കുട്ടി ട്രെയിനിനടിയില്‍ വെച്ച് എഴുന്നേല്‍ക്കാന്‍ ശ്രമിച്ചെങ്കിലും പിതാവ് ബലമായി ചേര്‍ത്തുപിടിച്ചതിനാല്‍ വലിയ ദുരന്തം ഒഴിവായി. ട്രെയിന്‍ പൂര്‍ണ്ണമായും പ്ലാറ്റ്ഫോം വിട്ടതിനു പിന്നാലെ ഓടിയെത്തിയ റെയില്‍വേ ഉദ്യോഗസ്ഥരും യാത്രക്കാരും ചേര്‍ന്ന് ഇരുവരെയും ജീവിതത്തിലേക്ക് തിരികെക്കയറ്റി.
ഭാഗ്യം കൊണ്ട് നിസാര പരിക്കുകള്‍ മാത്രമാണ് ഇവര്‍ക്കുള്ളത്. സംഭവത്തിന്റെ സിസിടിവി ദൃശ്യങ്ങള്‍ പ്രചരിച്ചതോടെ സോഷ്യല്‍ മീഡിയയില്‍ ഈ പിതാവിന് അഭിനന്ദനപ്രവാഹമാണ്. ഒരു നിമിഷം പോലും വൈകാതെ ട്രെയിനിനടിയിലേക്ക് ചാടിയ പിതാവിന്റെ മനോധൈര്യത്തെ ആളുകള്‍ വാഴ്‌ത്തുന്നു. നീങ്ങിത്തുടങ്ങിയ ട്രെയിനില്‍ നിന്ന് ഇറങ്ങാന്‍ ശ്രമിക്കുന്നത് എത്രത്തോളം അപകടകരമാണെന്ന് ഈ സംഭവം ഓര്‍മ്മിപ്പിക്കുന്നു.
മരണത്തിന്റെ വക്കില്‍ നിന്ന് മകനെ ജീവിതത്തിലേക്ക് തിരികെ പിടിച്ചുകയറ്റിയ ഈ പിതാവ് ഇപ്പോള്‍ ഇന്റര്‍നെറ്റിലെ താരമാണ്. സ്വന്തം ജീവനേക്കാള്‍ കുഞ്ഞിന്റെ സുരക്ഷയ്‌ക്ക് വില നല്‍കിയ ആ പിതൃസ്‌നേഹത്തിന് മുന്നില്‍ തലകുനിക്കുകയാണ് റെയില്‍വേ യാത്രക്കാരും നാട്ടുകാരും.
