കൊച്ചി: കേരളം ഇതുവരെ ദര്‍ശിക്കാത്ത അതിശക്തമായ ഭരണവിരുദ്ധ വികാരം വോട്ടെണ്ണലില്‍ പ്രതിഫലിക്കുമെന്ന് രാഷ്‌ട്രീയ നിരീക്ഷകന്‍ അഡ്വ. എ. ജയശങ്കര്‍. മുഖ്യമന്ത്രി പിണറായി വിജയന്റെ നേതൃത്വത്തിലുള്ള ഭരണത്തോടുള്ള ജനങ്ങളുടെ പ്രതിഷേധം പോളിംഗ് മെഷീനുകളില്‍ രേഖപ്പെടുത്തപ്പെട്ടു കഴിഞ്ഞെന്നും അദ്ദേഹം അഭിപ്രായപ്പെട്ടു. വോട്ടെണ്ണലിന് തൊട്ടുമുമ്പുള്ള മണിക്കൂറുകളില്‍ ഇടത് മുന്നണിയെ ആശങ്കയിലാഴ്‌ത്തുന്ന നിരീക്ഷണങ്ങളാണ് അദ്ദേഹം പങ്കുവെച്ചത്. മാസപ്പടി വിവാദം, സ്വര്‍ണ്ണക്കടത്ത് തുടങ്ങി സര്‍ക്കാരിനെ പ്രതിക്കൂട്ടിലാക്കിയ അഴിമതി ആരോപണങ്ങളും മുഖ്യമന്ത്രിയുടെ ഏകപക്ഷീയമായ ഭരണശൈലിയും ജനരോഷത്തിന് കാരണമായിട്ടുണ്ട്.
സാധാരണക്കാരനെ വലയ്‌ക്കുന്ന നികുതി വര്‍ദ്ധനവിനെതിരെ പൊതുസമൂഹത്തില്‍ നിലനില്‍ക്കുന്ന അമര്‍ഷം വോട്ടെടുപ്പില്‍ പ്രതിഫലിക്കും. പുറമെ പ്രകടമാകാത്ത ഒരു ‘നിശബ്ദ സുനാമി’ ഇത്തവണത്തെ ഫലത്തെ സ്വാധീനിക്കുമെന്നും അത് ഭരണമാറ്റത്തിന് വഴിതെളിക്കുമെന്നും അദ്ദേഹം പറഞ്ഞു. എല്‍.ഡി.എഫിന്റെ പരമ്പരാഗത വോട്ട് ബാങ്കുകളില്‍ ഇത്തവണ വലിയ വിള്ളലുകള്‍ വീണിട്ടുണ്ടെന്ന് ജയശങ്കര്‍ ചൂണ്ടിക്കാട്ടുന്നു. കേന്ദ്ര സര്‍ക്കാരിന്റെ വികസന പദ്ധതികളും എന്‍.ഡി.എയുടെ സജീവമായ സാന്നിധ്യവും ഇടത് കോട്ടകളെ ദുര്‍ബലപ്പെടുത്തിയിട്ടുണ്ട്.
മുഖ്യമന്ത്രിയുടെ അപ്രമാദിത്വത്തിന് എതിരായ ജനാധിപത്യപരമായ തിരിച്ചടിയാകും ഈ നിയമസഭാ തിരഞ്ഞെടുപ്പ് ഫലമെന്നും അദ്ദേഹം വിലയിരുത്തി. ‘കേരളത്തിലെ വോട്ടര്‍മാര്‍ ആഗ്രഹിക്കുന്നത് വെറുമൊരു ഭരണമാറ്റമല്ല, മറിച്ച് രാഷ്‌ട്രീയമായ ഒരു ശുദ്ധീകരണമാണ്. പോളിംഗ് കണക്കുകള്‍ പരിശോധിക്കുമ്പോള്‍ ഇടതുകോട്ടകള്‍ തകരുന്ന കാഴ്ചയാകും കാണാനാവുക എന്നും അദ്ദേഹം ചൂണ്ടിക്കാട്ടി. ലോക്‌സഭാ, തദ്ദേശ തിരഞ്ഞെടുപ്പുകളില്‍ കണ്ട ജനരോഷം അതിന്റെ പൂര്‍ണ്ണരൂപത്തില്‍ ഇത്തവണ പ്രകടമാകും.
കഴിഞ്ഞ അഞ്ച് വര്‍ഷത്തെ ഭരണത്തോടുള്ള തിരുത്തല്‍ വായനയായിരിക്കും ഈ ജനവിധിയെന്നും, പിണറായി വിജയന്‍ എന്ന രാഷ്‌ട്രീയ ബിംബം തകരുന്നതാകും വോട്ടെണ്ണല്‍ കഴിയുമ്പോള്‍ കേരളം കാണുകയെന്നും അദ്ദേഹം കൂട്ടിച്ചേര്‍ത്തു. വോട്ടെണ്ണല്‍ കേന്ദ്രങ്ങളില്‍ നിന്ന് ഫലം പുറത്തുവരുന്നതോടെ രാഷ്‌ട്രീയ കേരളത്തില്‍ വലിയ മാറ്റങ്ങള്‍ സംഭവിക്കുമെന്നാണ് ജയശങ്കറിന്റെ പ്രവചനം.
