ന്യൂഡൽഹി: രാജ്യത്തെ സ്‌കൂളുകളുടെ ഭരണത്തിലും വികസന പ്രവർത്തനങ്ങളിലും രക്ഷിതാക്കൾക്കും പ്രാദേശിക സമൂഹത്തിനും കൂടുതൽ പങ്കാളിത്തം ഉറപ്പാക്കുന്ന പുതിയ മാർഗനിർദേശങ്ങൾ കേന്ദ്ര വിദ്യാഭ്യാസ മന്ത്രാലയം പുറത്തിറക്കി.
സ്‌കൂൾ മാനേജ്‌മെന്റ് കമ്മിറ്റികളുടെ അധ്യക്ഷ, ഉപാധ്യക്ഷ സ്ഥാനങ്ങളിലേക്ക് രക്ഷിതാക്കളിൽ നിന്നുള്ള പ്രതിനിധികളെ തന്നെ നിയമിക്കണമെന്നതാണ് പുതിയ പരിഷ്‌കാരങ്ങളിലെ ഏറ്റവും പ്രധാനപ്പെട്ട ശുപാർശ. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ ബുധനാഴ്ചയാണ് ഇത് സംബന്ധിച്ച മാർഗരേഖ പ്രകാശനം ചെയ്തത്.
പുതിയ നിയമപ്രകാരം സ്‌കൂൾ പ്രിൻസിപ്പലോ ഹെഡ്മാസ്റ്ററോ സമിതിയുടെ മെമ്പർ സെക്രട്ടറി ആയിരിക്കും. കൂടാതെ അക്കാദമിക് കമ്മിറ്റി, സ്‌കൂൾ ബിൽഡിങ് കമ്മിറ്റി എന്നിങ്ങനെ രണ്ട് ഉപസമിതികൾ രൂപീകരിക്കാനും നിർദ്ദേശമുണ്ട്. പ്രീ-പ്രൈമറി മുതൽ പന്ത്രണ്ടാം ക്ലാസ് വരെയുള്ള വിദ്യാഭ്യാസ മേഖലയിൽ ദേശീയ വിദ്യാഭ്യാസ നയത്തിന് അനുസൃതമായ മാറ്റങ്ങളാണ് ഇതിലൂടെ ലക്ഷ്യമിടുന്നത്.
സ്‌കൂളിലെ വിദ്യാർത്ഥികളുടെ എണ്ണത്തിന് ആനുപാതികമായാണ് കമ്മിറ്റി അംഗങ്ങളെ നിശ്ചയിക്കുന്നത്. 100 കുട്ടികൾ വരെയാണെങ്കിൽ 12 – 15 അംഗങ്ങളും,100 – 500 വരെയാണെങ്കിൽ 15 – 20 അംഗങ്ങളും, 500-ന് മുകളിലാണെങ്കിൽ 20 – 25 അംഗങ്ങളും സമിതിയിലുണ്ടാകും. തദ്ദേശ സ്വയംഭരണ പ്രതിനിധികൾ, അധ്യാപകർ, പൂർവ്വ വിദ്യാർത്ഥികൾ, ആശാ വർക്കർമാർ, അംഗനവാടി പ്രവർത്തകർ എന്നിവർക്കും സമിതിയിൽ പ്രാതിനിധ്യമുണ്ടാകും. സ്‌കൂൾ വികസന കാര്യങ്ങളിൽ സമിതിക്ക് വിപുലമായ അധികാരങ്ങളാണ് നൽകിയിരിക്കുന്നത്. 30 ലക്ഷം രൂപ വരെ ചെലവ് വരുന്ന നിർമ്മാണ പ്രവർത്തനങ്ങൾ നേരിട്ട് നടത്താൻ സമിതിക്ക് അധികാരമുണ്ടാകും.
കൂടാതെ, കേന്ദ്ര പദ്ധതികളായ സമഗ്ര ശിക്ഷ, പി.എം പോഷൺ, നിപുൺ ഭാരത് എന്നിവയുടെ മേൽനോട്ട ചുമതലയും സമിതിക്കായിരിക്കും. വിദ്യാഭ്യാസ അവകാശ നിയമം അനുസരിച്ച് സമിതിയിലെ 75 ശതമാനം അംഗങ്ങളും രക്ഷിതാക്കളായിരിക്കണം. ഇതിൽ പകുതി പേർ സ്ത്രീകളായിരിക്കണമെന്നും മാർഗരേഖ നിഷ്‌കർഷിക്കുന്നു. രണ്ട് വർഷമാണ് സമിതിയുടെ കാലാവധി. ഓരോ അധ്യയന വർഷത്തിന്റെ തുടക്കത്തിലും സ്‌കൂൾ മേധാവി സമിതിയിലേക്കുള്ള തിരഞ്ഞെടുപ്പ് നടപടികൾ പൂർത്തിയാക്കേണ്ടതുണ്ട്.
സംസ്ഥാനങ്ങൾക്ക് സ്വന്തം നിലയിൽ ചട്ടങ്ങൾ രൂപീകരിക്കുന്നതിനുള്ള അടിസ്ഥാന മാതൃകയായിട്ടായിരിക്കും ഈ കേന്ദ്ര മാർഗരേഖ പ്രവർത്തിക്കുക. സ്‌കൂളുകളുടെ ഗുണനിലവാരം ഉയർത്തുന്നതിൽ ഈ ജനകീയ പങ്കാളിത്തം വലിയ മാറ്റമുണ്ടാക്കുമെന്ന് മന്ത്രി ധർമ്മേന്ദ്ര പ്രധാൻ പറഞ്ഞു.
