ബാലസോര്: ഒഡീഷയിലെ ബാലസോര് ജില്ലയില് കുളത്തില് കുളിക്കാനിറങ്ങിയ രണ്ട് വിദ്യാര്ത്ഥികള് മുങ്ങിമരിച്ചു. ബാലസോര് ടൗണിലെ ഹോസ്റ്റലിന് സമീപമുള്ള കുളത്തില് കുളിക്കുന്നതിനിടെയാണ് അപകടം സംഭവിച്ചത്. ഭദ്രക് ജില്ലയിലെ ബസുദേവ്പൂര് സ്വദേശികളായ പ്രത്യുഷ് കുമാര് മല്ലിക് (17), സ്മൃതി രഞ്ജന് മഹാഭോയ് (18) എന്നിവരാണ് മരിച്ചത്.
ബാലസോറിലെ മാന്സിംഗ് ബസാര് ഏരിയയിലുള്ള ഹോസ്റ്റലിലായിരുന്നു ഇരുവരും താമസിച്ചിരുന്നത്. വിവരമറിഞ്ഞ് സ്ഥലത്തെത്തിയ ഫയര് ആന്ഡ് എമര്ജന്സി സര്വീസ് ഉദ്യോഗസ്ഥര് മൃതദേഹങ്ങള് പുറത്തെടുത്ത് ജില്ലാ ആശുപത്രിയില് എത്തിച്ചെങ്കിലും ഡോക്ടര്മാര് മരണം സ്ഥിരീകരിച്ചു. മൃതദേഹങ്ങള് പോസ്റ്റ്മോര്ട്ടത്തിന് അയച്ചതായും അസ്വാഭാവിക മരണത്തിന് കേസെടുത്തതായും പോലീസ് അറിയിച്ചു.
ബാലസോര് ജില്ലയില് ഒരാഴ്ചക്കിടെ സമാനമായ രീതിയില് സംഭവിക്കുന്ന രണ്ടാമത്തെ അപകടമാണിത്. കഴിഞ്ഞ ഞായറാഴ്ച ബാലസോറിലെ ഖാന്തപദ പോലീസ് പരിധിയിലുള്ള ഭൂയിന്പദ ഗ്രാമത്തില് കുളത്തില് കുളിക്കാനിറങ്ങിയ പത്ത് വയസ്സുകാരായ രണ്ട് പെണ്കുട്ടികള് മുങ്ങിമരിച്ചിരുന്നു. അന്നപൂര്ണ്ണ മല്ലിക്, അനന്യ മല്ലിക് എന്നിവരാണ് അന്ന് മരിച്ചത്.
രാവിലെ 11 മണിയോടെ കുളിക്കാനിറങ്ങിയ ഇവര് ഏറെ നേരം കഴിഞ്ഞിട്ടും തിരിച്ചെത്താതിരുന്നതിനെത്തുടര്ന്ന് നടത്തിയ തെരച്ചിലിലാണ് മൃതദേഹങ്ങള് കണ്ടെത്തിയത്. കുട്ടികളുടെയും യുവാക്കളുടെയും തുടര്ച്ചയായ മരണങ്ങള് പ്രദേശത്ത് വലിയ ശോകമൂകമായ അന്തരീക്ഷമാണ് സൃഷ്ടിച്ചിരിക്കുന്നത്. സംഭവങ്ങളില് പോലീസ് കൂടുതല് അന്വേഷണം നടത്തിവരികയാണ്.
