കൊല്ക്കത്ത: പശ്ചിമ ബംഗാളില് ചരിത്രപരമായ രാഷ്ട്രീയ മാറ്റത്തിന് സാക്ഷ്യം വഹിച്ച് ബിജെപി നേതാവ് സുവേന്ദു അധികാരി സംസ്ഥാനത്തിന്റെ പുതിയ മുഖ്യമന്ത്രിയാകുന്നു. കൊല്ക്കത്തയിലെ വിശ്വ ബംഗ്ലാ കണ്വെന്ഷന് സെന്ററില് നടന്ന ബിജെപി നിയമസഭാ കക്ഷി യോഗത്തിലാണ് സുവേന്ദുവിനെ ഭരണത്തലവനായി കേന്ദ്ര ആഭ്യന്തര മന്ത്രി അമിത് ഷാ പ്രഖ്യാപിച്ചത്. ബംഗാളില് ബിജെപിയുടെ വിജയത്തിന് അടിത്തറ പാകിയ പോരാളിയെ തന്നെ മുഖ്യമന്ത്രി സ്ഥാനത്തേക്ക് പാര്ട്ടി നിയോഗിക്കുകയായിരുന്നു.
മമത ബാനര്ജിക്കെതിരെ നന്ദിഗ്രാമിലും ഭവാനിപുരിലും നേടിയ അവിശ്വസനീയമായ വിജയമാണ് സുവേന്ദുവിനെ മുഖ്യമന്ത്രി കസേരയിലേക്ക് നയിച്ചത്. തൃണമൂല് കോണ്ഗ്രസിന്റെ ശക്തികേന്ദ്രമായ ഭവാനിപുരില് മമത ബാനര്ജിയെ 15,000-ത്തിലധികം വോട്ടുകള്ക്ക് പരാജയപ്പെടുത്തിയത് ദേശീയ തലത്തില് ശ്രദ്ധിക്കപ്പെട്ടിരുന്നു. സംസ്ഥാന അധ്യക്ഷന് സമീക് ഭട്ടാചാര്യയാണ് നിയമസഭാ കക്ഷി യോഗത്തില് സുവേന്ദുവിന്റെ പേര് നിര്ദ്ദേശിച്ചത്. അശോക് ദിന്ഡ ഉള്പ്പെടെയുള്ള പ്രമുഖ നേതാക്കള് ഈ തീരുമാനത്തെ ഐകകണ്ഠ്യേന പിന്തുണച്ചു.
നാളെ രാവിലെ 11 മണിക്ക് കൊല്ക്കത്തയിലെ ബ്രിഗേഡ് പരേഡ് ഗ്രൗണ്ടില് വെച്ച് സുവേന്ദു അധികാരിയും മന്ത്രിസഭാംഗങ്ങളും സത്യപ്രതിജ്ഞ ചെയ്ത് അധികാരമേല്ക്കും. കേന്ദ്രമന്ത്രിമാര്, പ്രമുഖ സിനിമാ താരങ്ങള്, വന്കിട വ്യവസായികള് എന്നിവര് ചടങ്ങില് പങ്കെടുക്കും. ദീര്ഘകാലത്തെ ഇടവേളയ്ക്ക് ശേഷം ബംഗാള് ഭരണചക്രം പുതിയൊരു ദിശയിലേക്ക് നീങ്ങുന്നതിന്റെ തുടക്കമാണിത്. സുവേന്ദു അധികാരിയുടെ നേതൃത്വത്തിലുള്ള പുതിയ സര്ക്കാര് സംസ്ഥാനത്തിന്റെ വികസന കുതിപ്പിന് വേഗത കൂട്ടുമെന്ന പ്രതീക്ഷയിലാണ് പ്രവര്ത്തകരും അനുയായികളും.
