തിരുവനന്തപുരം/ന്യൂഡല്‍ഹി: കേരളത്തിന്റെ മുഖ്യമന്ത്രി പദത്തെച്ചൊല്ലി കോണ്‍ഗ്രസ് നേതാക്കള്‍ക്കായി അണികള്‍ നടത്തുന്ന ശക്തിപ്രകടനങ്ങളിലും പരസ്യമായ വാക്‌പോരുകളിലും അതീവ ജാഗ്രതയുമായി ഹൈക്കമാന്‍ഡ്. കെപിസിസിയുടെ വിലക്ക് ലംഘിച്ച് സംസ്ഥാനത്തുടനീളം പ്രകടനങ്ങളും ഫ്‌ലക്‌സ് യുദ്ധങ്ങളും തുടരുന്ന സാഹചര്യത്തില്‍, കുറ്റക്കാര്‍ക്കെതിരെ അച്ചടക്ക നടപടി സ്വീകരിക്കാന്‍ മല്ലികാര്‍ജുന്‍ ഖാര്‍ഗെ കെപിസിസി നേതൃത്വത്തിന് നിര്‍ദ്ദേശം നല്‍കി.
വി.ഡി സതീശനെ മുഖ്യമന്ത്രിയാക്കണമെന്ന് ആവശ്യപ്പെട്ട് ‘പട നയിച്ചവന്‍ നാട് നയിക്കട്ടെ’ എന്ന മുദ്രാവാക്യവുമായി കോഴിക്കോട് മുതലക്കുളം മൈതാനം മുതല്‍ കിഡ്സണ്‍ കോര്‍ണര്‍ വരെ പ്രവര്‍ത്തകര്‍ പ്രകടനം നടത്തി. വയനാട് ഉള്‍പ്പെടെയുള്ള ജില്ലകളിലും സതീശനായി വലിയ ഫ്‌ലക്‌സുകള്‍ ഉയര്‍ന്നിട്ടുണ്ട്. അതേസമയം, എഐസിസി ജനറല്‍ സെക്രട്ടറി കെ.സി വേണുഗോപാലിനെതിരെ ഡല്‍ഹിയില്‍ ഖാര്‍ഗെയുടെ വസതിക്ക് മുന്നില്‍ പോലും പ്രതിഷേധ ബോര്‍ഡുകള്‍ പ്രത്യക്ഷപ്പെട്ടു.
‘ജനവിധി മാനിക്കാന്‍ ഉളുപ്പുണ്ടാകണം’ എന്ന തരത്തിലുള്ള വാചകങ്ങളാണ് കെ.സിക്കെതിരെയുള്ള ബോര്‍ഡുകളിലുള്ളത്. ഇത്തരം ഗ്രൂപ്പ് പോരുകള്‍ പാര്‍ട്ടിയുടെ പ്രതിച്ഛായയ്‌ക്ക് മങ്ങലേല്‍പ്പിക്കുന്നതായി ഹൈക്കമാന്‍ഡ് വിലയിരുത്തുന്നു. കേരളത്തിലെ ഗ്രൂപ്പ് കളിയില്‍ അതൃപ്തി അറിയിച്ച ദീപ ദാസ് മുന്‍ഷി എഐസിസി അധ്യക്ഷന്‍ മല്ലികാര്‍ജുന്‍ ഖാര്‍ഗെയുമായി കൂടിക്കാഴ്ച നടത്തി. വ്യക്തിപരമായ താല്പര്യങ്ങള്‍ മുന്‍നിര്‍ത്തി തെരുവില്‍ പ്രകടനം നടത്തുന്നവര്‍ക്കെതിരെ ഉടന്‍ നടപടിയുണ്ടാകും.
പാര്‍ട്ടി ചട്ടക്കൂട് ലംഘിച്ച് പരസ്യ പ്രസ്താവനകള്‍ നടത്തുന്ന നേതാക്കളോടും പ്രവര്‍ത്തകരോടും വിട്ടുവീഴ്ച വേണ്ടെന്നാണ് എഐസിസി തീരുമാനം. അച്ചടക്ക ലംഘനം ശ്രദ്ധയില്‍പ്പെട്ടാല്‍ ഉടന്‍ റിപ്പോര്‍ട്ട് നല്‍കാന്‍ കെപിസിസിയോട് ഹൈക്കമാന്‍ഡ് ആവശ്യപ്പെട്ടു. ആര്‍ക്കെങ്കിലും വേണ്ടി വ്യക്തിപരമായ പ്രകടനങ്ങള്‍ നടത്തുന്നത് തെറ്റായ കീഴ്വഴക്കമാണെന്ന് കെപിസിസി പ്രസിഡന്റ് ഓര്‍മ്മിപ്പിച്ചു. ഹൈക്കമാന്‍ഡ് മുഖ്യമന്ത്രിയുടെ കാര്യത്തില്‍ തീരുമാനം എടുക്കാനിരിക്കെ, സമ്മര്‍ദ്ദതന്ത്രങ്ങളുമായി രംഗത്തിറങ്ങുന്നവര്‍ കടുത്ത അച്ചടക്ക നടപടി നേരിടേണ്ടി വരുമെന്നും അദ്ദേഹം വ്യക്തമാക്കി.
പ്രകടനങ്ങളില്‍ പങ്കെടുത്ത പ്രാദേശിക നേതാക്കളുടെ വിവരങ്ങള്‍ പാര്‍ട്ടി ശേഖരിച്ചു തുടങ്ങിയിട്ടുണ്ട്. ഉടന്‍ തന്നെ കാരണംകാണിക്കല്‍ നോട്ടീസ് നല്‍കാനാണ് നേതൃത്വത്തിന്റെ നീക്കം.
