മലപ്പുറം: വെങ്ങാട് മൂര്ക്കനാട് റോഡിലെ കള്ളുഷാപ്പില് പട്ടാപ്പകല് വന് കവര്ച്ച. ഷാപ്പുടമയെ തള്ളിയിട്ട് പരിക്കേല്പ്പിച്ച ശേഷം എട്ട് പവന്റെ സ്വര്ണ്ണമാലയും മൊബൈല് ഫോണും കവര്ന്നു. കഴിഞ്ഞ ദിവസം ഉച്ചയ്ക്ക് 12.45-ഓടെയാണ് സിനിമാ സ്റ്റൈല് കവര്ച്ച നടന്നത്. രണ്ടുപേരടങ്ങുന്ന സംഘമാണ് ഷാപ്പിലെത്തിയത്. കള്ള് കുടിച്ച ശേഷം പണം നല്കാനെന്ന വ്യാജേന എഴുന്നേറ്റ ഇവര് ഉടന് അക്രമാസക്തരാവുകയായിരുന്നു.
ഇതില് ഒരാള് ഷാപ്പിലെ കറിവെപ്പുകാരനെ ഓടിച്ചെന്ന് അടുക്കളയില് കയറ്റി പുറത്തുനിന്ന് പൂട്ടി. തുടര്ന്ന് രണ്ടാമന് ഷാപ്പുടമ ചോലക്കുഴിയില് ദാമോദരന്റെ കഴുത്തിലെ എട്ട് പവനോളം വരുന്ന സ്വര്ണ്ണമാല പൊട്ടിച്ചെടുക്കുകയായിരുന്നു. മാല പിടിച്ചുപറിക്കുന്നത് തടയാന് ശ്രമിച്ച ദാമോദരനെ പ്രതികള് ബലമായി തള്ളിയിട്ടു. വീഴ്ചയില് ഇദ്ദേഹത്തിന് പരിക്കേറ്റിട്ടുണ്ട്. മാലയ്ക്ക് പുറമെ മേശപ്പുറത്തിരുന്ന പതിനായിരം രൂപയോളം വിലവരുന്ന മൊബൈല് ഫോണും കൈക്കലാക്കിയാണ് സംഘം കടന്നുകളഞ്ഞത്.
സ്വര്ണ്ണത്തിനും ഫോണിനും കൂടി ഏകദേശം 8.10 ലക്ഷം രൂപയുടെ നഷ്ടം സംഭവിച്ചതായി ഉടമ പരാതിയില് പറയുന്നു. സംഭവത്തില് കൊളത്തൂര് പോലീസ് കേസെടുത്ത് അന്വേഷണം ആരംഭിച്ചു. പ്രതികളില് ഒരാളെ തിരിച്ചറിഞ്ഞതായും രണ്ടാമന് അജ്ഞാതനാണെന്നും പോലീസ് വ്യക്തമാക്കി. പ്രദേശത്തെ സിസിടിവി ദൃശ്യങ്ങള് കേന്ദ്രീകരിച്ച് പ്രതികള്ക്കായി തിരച്ചില് ഊര്ജിതമാക്കിയിരിക്കുകയാണ്.
