കൊച്ചി: കേരളത്തിലെ യുവ ബാസ്‌ക്കറ്റ്ബോള്‍ കളിക്കാര്‍ക്ക് പ്രൊഫഷണല്‍ കരിയറിലേക്ക് ചുവടുവെക്കാനുള്ള സുപ്രധാന വേദിയൊരുങ്ങുന്നു. ‘ബാസ്‌ക്കറ്റ്ബോള്‍ ലീഗ് കേരള’ ഒന്നാം സീസണിന്റെ താരലേലം കൊച്ചി റാഡിസണ്‍ ബ്ലൂ ഹോട്ടലില്‍ വിജയകരമായി പൂര്‍ത്തിയായി. കേരള ബാസ്‌ക്കറ്റ്ബോള്‍ അസോസിയേഷന്റെ പൂര്‍ണ്ണ പിന്തുണയോടെ സ്റ്റാര്‍ട്ടിങ് ഫൈവ് സ്പോര്‍ട്സ് മാനേജ്മെന്റും പൂനെയിലെ എബിസി ബാസ്‌ക്കറ്റ്ബോള്‍ ഡെവലപ്മെന്റ് ലീഗും സംയുക്തമായാണ് ഈ കായിക മാമാങ്കം സംഘടിപ്പിക്കുന്നത്.
ലേലഹാളില്‍ ലക്ഷങ്ങളുടെ കനത്ത വിളികളാണ് ഉയര്‍ന്നതെങ്കിലും, ഇത് കളിക്കാര്‍ക്ക് നേരിട്ട് നല്‍കുന്ന പ്രതിഫലമല്ലെന്ന് സംഘാടകര്‍ വ്യക്തമാക്കി. കുട്ടികളുടെ വികസനത്തിന് പ്രാധാന്യം നല്‍കുന്ന ഒരു ഗ്രാസ്റൂട്ട് പദ്ധതിയായതിനാല്‍ ഈ സീസണില്‍ കളിക്കാര്‍ക്ക് ശമ്പളമോ പണമിടപാടുകളോ ഉണ്ടാകില്ല. ലേലത്തില്‍ രേഖപ്പെടുത്തിയ തുകകള്‍ ടീമുകള്‍ രൂപീകരിക്കുന്നതിനുള്ള ‘സാലറി ക്യാപ്’ അഥവാ പോയിന്റ് പരിധി മാത്രമാണ്.
യുവതലമുറയ്‌ക്ക് ഇതൊരു അമച്വര്‍ ലീഗ് ആണെങ്കിലും, വരാനിരിക്കുന്ന വലിയൊരു പ്രൊഫഷണല്‍ കരിയറിലേക്കുള്ള വാതിലാണിതെന്ന് ബിഎല്‍കെ സ്ഥാപകനും പ്രൊമോട്ടറുമായ ആര്‍. അനില്‍കുമാര്‍ പറഞ്ഞു. ഈ വര്‍ഷാവസാനം വിദേശ താരങ്ങളെ കൂടി ഉള്‍പ്പെടുത്തി ആരംഭിക്കുന്ന പ്രൊഫഷണല്‍ സീനിയര്‍ ലീഗിലേക്ക്, നിലവിലെ അണ്ടര്‍-19 വിഭാഗത്തില്‍ മികച്ച പ്രകടനം നടത്തുന്ന കുട്ടികള്‍ക്ക് നേരിട്ട് പ്രവേശനം നല്‍കാനാണ് സംഘാടകരുടെ പദ്ധതി.
സംസ്ഥാനവ്യാപകമായി നടത്തിയ ട്രയല്‍സിലൂടെയും ‘വണ്‍ മിനിറ്റ് ടു ഹൂപ്പ്’ ചലഞ്ചിലൂടെയും തിരഞ്ഞെടുത്ത 500-ലധികം യുവ പ്രതിഭകളാണ് ലേലപ്പട്ടികയില്‍ ഇടംപിടിച്ചത്. ടൂര്‍ണമെന്റിലെ പ്രമുഖ ആറ് ഫ്രാഞ്ചൈസികളായ തിരുവനന്തപുരം കാപ്പിറ്റല്‍സ്, കൊച്ചി സ്റ്റാലിയന്‍സ്, കാലിക്കറ്റ് വാരിയേഴ്സ്, തൃശൂര്‍ ടസ്‌കേഴ്സ്, കോട്ടയം ബൈസണ്‍സ്, ആലപ്പുഴ ഡോള്‍ഫിന്‍സ് എന്നിവര്‍ താരങ്ങള്‍ക്കായി ലേലത്തില്‍ ശക്തമായി മത്സരിച്ചു.
കോഴിക്കോട് സ്വദേശിനി അക്ഷര കെ.യെ 14 ലക്ഷം റെക്കോര്‍ഡ് പോയിന്റിന് തൃശൂര്‍ ടസ്‌കേഴ്സ് സ്വന്തമാക്കിയതാണ് ലേലത്തിലെ ഏറ്റവും വലിയ നേട്ടം. ആലപ്പുഴയില്‍ നിന്നുള്ള കെ. വൈ. റെക്സണ്‍ ആന്റണിയെ 11.25 ലക്ഷം പോയിന്റിന് കൊച്ചി സ്റ്റാലിയന്‍സ് സ്വന്തമാക്കി. കോട്ടയത്തിന്റെ ജിന്‍സ് കെ. ജോബിയെ 10.5 ലക്ഷം പോയിന്റിന് കൊച്ചി സ്റ്റാലിയന്‍സ് ടീമിലെത്തിച്ചു. കോഴിക്കോട് സ്വദേശിനി ആര്‍ത്തിക കെ.യെ 9.5 ലക്ഷം പോയിന്റിന് തൃശൂര്‍ ടസ്‌കേഴ്സ് സ്വന്തമാക്കി.
പ്രധാന ടൂര്‍ണമെന്റ് ജൂണ്‍ 4 മുതല്‍ ജൂണ്‍ 13 വരെ കൊച്ചി കടവന്ത്രയിലുള്ള രാജീവ് ഗാന്ധി ഇന്‍ഡോര്‍ സ്റ്റേഡിയത്തില്‍ വെച്ച് നടക്കും. അണ്ടര്‍-14, അണ്ടര്‍-19 വിഭാഗങ്ങളിലായി ആണ്‍കുട്ടികള്‍ക്കും പെണ്‍കുട്ടികള്‍ക്കും പ്രത്യേക ലീഗ് മത്സരങ്ങള്‍ ഉണ്ടായിരിക്കും.
അന്തിമ ടീം സ്‌ക്വാഡ് (പ്രധാന താരങ്ങള്‍ ഒരു നോട്ടത്തില്‍):
അണ്ടര്‍-19 (പെണ്‍കുട്ടികള്‍):
തിരുവനന്തപുരം കാപ്പിറ്റല്‍സ്: ബ്രിസ ബിനു, ഗംഗ രാജഗോപാല്‍, നിവേദിത രതീഷ്, അഞ്ജു എ. ജോസഫ് ഉള്‍പ്പെടെ 12 പേര്‍.
കൊച്ചി സ്റ്റാലിയന്‍സ്: അയന മരിയം ഫിലിപ്പ്, ക്ലൗഡിയ ഒണ്ടേന്‍, എറില്‍ ഫെര്‍ണാണ്ടസ്, സേറ തോംസണ്‍ ഉള്‍പ്പെടെ 12 പേര്‍.
കാലിക്കറ്റ് വാരിയേഴ്സ്: നിരഞ്ജന ജിജു, ശിവേന്ദു കെ., ശിവാനി അജിത്, ശ്രീയ പി. ഉള്‍പ്പെടെ 12 പേര്‍.
തൃശൂര്‍ ടസ്‌കേഴ്സ്: ആര്‍ത്തിക കെ. (മാര്‍ക്വി താരം), അനീഷ ഷിബു, അനിഹ വിക്ടോറിയ ഉള്‍പ്പെടെ 12 പേര്‍.
കോട്ടയം ബൈസണ്‍സ്: അഞ്ജലി ജസീന്ത, മിഷെല്‍ മീറ്റോ, ആമി അന്ന ജോണ്‍സണ്‍, അഭിന ആര്‍. ഉള്‍പ്പെടെ 12 പേര്‍.
ആലപ്പുഴ ഡോള്‍ഫിന്‍സ്: അമല അന്ന ജോയ്, സോന മാത്യു, അനഘ പി., തേജസ് ടോണിയാസ് ഉള്‍പ്പെടെ 12 പേര്‍.
അണ്ടര്‍-19 (ആണ്‍കുട്ടികള്‍):
തിരുവനന്തപുരം കാപ്പിറ്റല്‍സ്: ആല്‍ഡ്രിന്‍ ആന്റോ, ജിയാന്‍ എ.പി.എം, മുഹമ്മദ് സിനാന്‍ ഉള്‍പ്പെടെ 12 പേര്‍.
കൊച്ചി സ്റ്റാലിയന്‍സ്: തന്മയ് കൃഷ്ണന്‍, അഭിനന്ദ് രാജേഷ്, ജിന്‍സ് കെ. ജോബി (മാര്‍ക്വി താരം) ഉള്‍പ്പെടെ 12 പേര്‍.
കാലിക്കറ്റ് വാരിയേഴ്സ്: ആര്‍നോള്‍ഡ് ജിമ്മി, നവനീത് ടി., ആഷിഖ് എസ്. ഉള്‍പ്പെടെ 12 പേര്‍.
തൃശൂര്‍ ടസ്‌കേഴ്സ്: യുവേഷ് എ., നിരഞ്ജന്‍, അദ്വൈത് എ. എസ്., പ്രവീണ്‍ ടി. ബിജു ഉള്‍പ്പെടെ 12 പേര്‍.
കോട്ടയം ബൈസണ്‍സ്: ജോഹാന്‍ തോമസ്, മുഹമ്മദ് അല്‍ത്താഫ്, ഹാറൂണ്‍ മുഹമ്മദ് ഉള്‍പ്പെടെ 12 പേര്‍.
ആലപ്പുഴ ഡോള്‍ഫിന്‍സ്: കാളിദാസ് എസ്., ജെറിന്‍ ജോഷി, ജീവന്‍ കെ. ജോബി ഉള്‍പ്പെടെ 12 പേര്‍.
അണ്ടര്‍-14 (പെണ്‍കുട്ടികള്‍):
ടോപ്പ് ബൈ താരം: കോഴിക്കോടിന്റെ അക്ഷര കെ. (തൃശൂര്‍ ടസ്‌കേഴ്സ്). കൂടാതെ മറ്റ് അഞ്ച് ഫ്രാഞ്ചൈസികളിലുമായി അദീന അന്ന (തിരുവനന്തപുരം), തെരേസ വില്‍സണ്‍ (കൊച്ചി), ശ്രീപ്രവണ ഇ. (കാലിക്കറ്റ്), ഭാഗ്യ ലക്ഷ്മി (കോട്ടയം), ധ്വന്വി വി.എസ് (ആലപ്പുഴ) തുടങ്ങിയ മിടുക്കികള്‍ വിവിധ ടീമുകളിലായി അണിനിരക്കുന്നു.
അണ്ടര്‍-14 (ആണ്‍കുട്ടികള്‍):
ടോപ്പ് ബൈ താരം: ആലപ്പുഴയുടെ കെ. വൈ. റെക്സണ്‍ ആന്റണി (കൊച്ചി സ്റ്റാലിയന്‍സ്). ഒപ്പം ഓംകാര്‍ അരുണ്‍ (തിരുവനന്തപുരം), ആദികൃഷ്ണ (കാലിക്കറ്റ്), അഭയ് പ്രവീണ്‍ (തൃശൂര്‍), കാര്‍ത്തിക് വി.പി (കോട്ടയം), ഫര്‍ഹാന്‍ സോഹെബ് (ആലപ്പുഴ) എന്നിവരുടെ നേതൃത്വത്തില്‍ ആറ് ടീമുകളും കിരീടത്തിനായി പോരാടും.
