ന്യൂഡല്ഹി: ആഭ്യന്തര പ്രതിരോധ ഉത്പാദന രംഗത്ത് വന് നേട്ടം കൈവരിച്ച് ഇന്ത്യ. മുന്നിര സ്വകാര്യ പ്രതിരോധ കമ്പനിയായ ‘നിബെ ലിമിറ്റഡ്’ വികസിപ്പിച്ചെടുത്ത അത്യാധുനിക ദീര്ഘദൂര ഗൈഡഡ് റോക്കറ്റ് സംവിധാനമായ ‘സൂര്യാസ്ത്ര’ ഒഡീഷയിലെ ചാന്ദിപൂര് ഇന്റഗ്രേറ്റഡ് ടെസ്റ്റ് റേഞ്ചില് വിജയകരമായി പരീക്ഷിച്ചു. സൂര്യാസ്ത്രയുടെ 150 കിലോമീറ്റര്, 300 കിലോമീറ്റര് പരിധിയുള്ള രണ്ട് പതിപ്പുകളാണ് പരീക്ഷണ വിധേയമാക്കിയത്. രണ്ട് പതിപ്പുകളും ലക്ഷ്യസ്ഥാനങ്ങള് കൃത്യമായി തകര്ത്തു.
ലക്ഷ്യഭേദനത്തിലെ കൃത്യതയാണ് ഈ പരീക്ഷണത്തില് ഏറ്റവും ശ്രദ്ധേയമായത്. 150 കിലോമീറ്റര് പരിധിയുള്ള സൂര്യാസ്ത്ര റോക്കറ്റ് ലക്ഷ്യത്തിന്റെ 1.5 മീറ്റര് പരിധിക്കുള്ളിലും, 300 കിലോമീറ്റര് പതിപ്പ് ലക്ഷ്യത്തിന്റെ വെറും 2 മീറ്റര് ചുറ്റളവിലുമാണ് പതിച്ചത്. സൈനിക ഭാഷയില് ഇതിനെ ‘സര്ക്കുലര് എറര് പ്രോബബിള്’ എന്നാണ് വിളിക്കുന്നത്. ഈ സംഖ്യ എത്രത്തോളം കുറയുന്നുവോ അത്രത്തോളം കൃത്യത കൂടുന്നു. ദീര്ഘദൂര റോക്കറ്റുകളെ സംബന്ധിച്ചിടത്തോളം ഇത്രയും കുറഞ്ഞ സിഇപി നിരക്ക് കൈവരിക്കാനായത് പ്രതിരോധ ലോകത്തെ വലിയൊരു നേട്ടമാണ്.
ശത്രുക്കളുടെ കമാന്ഡ് സെന്ററുകള്, റഡാര് സ്റ്റേഷനുകള്, സൈനിക അടിസ്ഥാന സൗകര്യങ്ങള്, ലോജിസ്റ്റിക് ഹബ്ബുകള് എന്നിവ പോലുള്ള അതീവ സുപ്രധാനമായ ലക്ഷ്യങ്ങളെ കൃത്യതയോടെ തകര്ക്കാന് രൂപകല്പ്പന ചെയ്ത പൂര്ണ്ണമായും തദ്ദേശീയമായ ഗൈഡഡ് റോക്കറ്റ് ആര്ട്ടിലറി സംവിധാനമാണിത്. പരമ്പരാഗത ആര്ട്ടിലറി ഷെല്ലുകളില് നിന്ന് വ്യത്യസ്തമായി, ലക്ഷ്യസ്ഥാനങ്ങളില് നിന്ന് എത്രയകലെയാണെങ്കിലും കൃത്യമായി ചെന്നിറങ്ങാന് സഹായിക്കുന്ന അത്യാധുനിക ഗൈഡന്സ് സാങ്കേതികവിദ്യയാണ് സൂര്യാസ്ത്രയില് ഉപയോഗിച്ചിരിക്കുന്നത്.
യുദ്ധരംഗത്ത് നേരിട്ടുള്ള സൈനിക നീക്കങ്ങള്ക്കും പിന്തുണയ്ക്കുമായാണ് 150 കിലോമീറ്റര് മോഡല് നിര്മ്മിച്ചിരിക്കുന്നത്. അതേസമയം, 300 കിലോമീറ്റര് ദൂരപരിധിയുള്ള പതിപ്പ് ശത്രുരാജ്യത്തിന്റെ ഉള്ളറകളിലെ തന്ത്രപ്രധാന ലക്ഷ്യങ്ങളെ സ്വന്തം സൈനികരുടെ ജീവന് അപകടത്തിലാക്കാതെ ദൂരെ നിന്നുതന്നെ തകര്ക്കാന് ഇന്ത്യന് സൈന്യത്തിന് പ്രാപ്തി നല്കുന്നതാണ്. ഈ പരീക്ഷണം കേവലം റോക്കറ്റിന്റെ കരുത്ത് തെളിയിക്കുന്നത് മാത്രമല്ല, ഇന്ത്യന് പ്രതിരോധ മേഖലയില് വന്നുകൊണ്ടിരിക്കുന്ന വലിയ മാറ്റത്തിന്റെ സൂചന കൂടിയാണ്.
മുന്പ് പൊതുമേഖലാ സ്ഥാപനങ്ങള് മിസൈല് മാത്രം പ്ലാറ്റ്ഫോമുകള്, ഡ്രോണുകള്, അഡ്വാന്സ്ഡ് ഇലക്ട്രോണിക്സ് എന്നിവയുടെ നിര്മ്മാണത്തിലേക്ക് നിബെ ലിമിറ്റഡ് പോലുള്ള സ്വകാര്യ ആഭ്യന്തര കമ്പനികള് കടന്നുവരുന്നത് ഇന്ത്യയുടെ നിര്മ്മാണ ശേഷി വര്ദ്ധിപ്പിക്കുകയും വിദേശ ഇറക്കുമതിയെ ആശ്രയിക്കുന്നത് കുറയ്ക്കുകയും ചെയ്യും. പ്രതിരോധ സാങ്കേതികവിദ്യയില് രാജ്യം സ്വയംപര്യാപ്തത കൈവരിക്കണമെന്ന കേന്ദ്ര സര്ക്കാരിന്റെ ‘ആത്മനിര്ഭര് ഭാരത്’ ദൗത്യത്തിന് അടിവരയിടുന്നതാണ് സൂര്യാസ്ത്രയുടെ വിജയം.
ഇത്തരത്തിലുള്ള കൃത്യതയാര്ന്ന ആയുധങ്ങള് ഭാവിയിലെ സുരക്ഷാ വെല്ലുവിളികള് നേരിടുന്നതില് ഇന്ത്യയുടെ ദീര്ഘദൂര യുദ്ധക്കരുത്തിന്റെ പ്രധാന അവിഭാജ്യ ഘടകമായി മാറും. പരീക്ഷണങ്ങള് ഇതേ രീതിയില് മുന്നോട്ടുപോയാല് സൂര്യാസ്ത്ര റോക്കറ്റുകള് ഉടന് തന്നെ ഇന്ത്യന് സൈന്യത്തിന്റെ ഭാഗമാകും.
