തിരുവനന്തപുരം: സംസ്ഥാനത്ത് മണ്സൂണ് കൂടുതല് ശക്തമാകുന്നു. വരും ദിവസങ്ങളില് വിവിധ ഭാഗങ്ങളില് കനത്ത മഴ പെയ്യാന് സാധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കി. നിലവിലെ സാഹചര്യത്തില് കാസര്കോട്, കണ്ണൂര്, കോഴിക്കോട് ജില്ലകളില് ഇന്ന് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. ഈ പ്രദേശങ്ങളില് ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കുന്നത്. മറ്റ് 11 ജില്ലകളില് നിലവില് യെല്ലോ അലര്ട്ടാണ്. ഇതിനൊപ്പം ഇന്നും നാളെയും കേരളത്തില് ഉടനീളം മണിക്കൂറില് 40 മുതല് 50 കിലോമീറ്റര് വരെ വേഗതയില് ശക്തമായ കാറ്റടിച്ചേക്കാമെന്നും കാലാവസ്ഥാ വകുപ്പ് വ്യക്തമാക്കുന്നു.
അടുത്ത മൂന്ന് മണിക്കൂറിനുള്ളില് ഇടുക്കി, മലപ്പുറം ജില്ലകളിലെ ചിലയിടങ്ങളില് ഇടിമിന്നലോട് കൂടിയ ശക്തമായ മഴയ്ക്കും മണിക്കൂറില് 50 കി.മീ വേഗതയുള്ള കാറ്റിനും സാധ്യതയുള്ളതിനാല് ഇവിടെ താല്ക്കാലികമായി ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. കേരളത്തിലുടനീളം ഇപ്പോള് വ്യാപകമായ മഴയാണ് ലഭിച്ചുകൊണ്ടിരിക്കുന്നത്. ചിലയിടങ്ങളില് 7 മുതല് 11 സെന്റീമീറ്റര് വരെയുള്ള അതിശക്തമായ മഴയ്ക്കും ഇടിമിന്നലിനും സാധ്യതയുണ്ടെന്നാണ് പ്രവചനം. അടുത്ത മൂന്ന് ദിവസം കൂടി സംസ്ഥാനത്ത് ഈ കനത്ത മഴയും ശക്തമായ കാറ്റും തുടരുമെന്നാണ് റിപ്പോര്ട്ട്. ഇന്ന് മൊത്തം ഏഴ് ജില്ലകളിലാണ് തീവ്ര മഴ മുന്നറിയിപ്പുള്ളത്.
മഴ കനത്തതോടെ ഇടുക്കി ജില്ലയിലെ മലയോര മേഖലകളില് രാത്രികാല യാത്രയ്ക്ക് ദുരന്തനിവാരണ അതോറിറ്റി നിരോധനം ഏര്പ്പെടുത്തിയിട്ടുണ്ട്. വൈകുന്നേരം 7 മണി മുതല് രാവിലെ 6 മണി വരെയാണ് നിയന്ത്രണം. ജില്ലയില് ഓറഞ്ച് അലര്ട്ട് പ്രഖ്യാപിച്ച പശ്ചാത്തലത്തില് ജില്ലാ കളക്ടറാണ് ഈ ഉത്തരവിറക്കിയത്. അപകട സാധ്യത മുന്നില്ക്കണ്ട് മലവെള്ളപ്പാച്ചില്, ഉരുള്പൊട്ടല്, മണ്ണിടിച്ചില് എന്നിവയ്ക്ക് സാധ്യതയുള്ള പ്രദേശങ്ങളില് ജീവിക്കുന്നവര് അധികൃതര് നിര്ദേശിക്കുന്ന സുരക്ഷിത സ്ഥാനങ്ങളിലേക്ക് മാറണം.
നദിക്കരകളിലും അണക്കെട്ടുകളുടെ താഴെയുള്ള പ്രദേശങ്ങളിലും താമസിക്കുന്നവരും ജാഗ്രത പാലിക്കുകയും മാറിത്താമസിക്കാന് തയ്യാറാവുകയും വേണം. ദുരന്തസാധ്യതയുള്ള മേഖലകളിലുള്ളവര് തങ്ങളുടെ പ്രദേശങ്ങളില് റിലീഫ് ക്യാമ്പുകള് തുറന്നിട്ടുണ്ടെന്ന് ഉറപ്പുവരുത്തേണ്ടതാണ്. പകല് സമയത്ത് തന്നെ ക്യാമ്പുകളിലേക്ക് മാറാന് തദ്ദേശ സ്ഥാപനങ്ങളുമായോ റവന്യൂ അധികാരികളുമായോ ബന്ധപ്പെടാം.
മോശം കാലാവസ്ഥയ്ക്കും ശക്തമായ കാറ്റിനും സാധ്യതയുള്ളതിനാല് കേരള – ലക്ഷദ്വീപ് – കര്ണാടക തീരങ്ങളില് ഇന്നും നാളെയും മത്സ്യബന്ധനത്തിന് പൂര്ണ്ണ വിലക്കേര്പ്പെടുത്തിയിട്ടുണ്ട്. ഈ തീരങ്ങളില് കാറ്റിന്റെ വേഗത മണിക്കൂറില് 40 മുതല് 50 കിലോമീറ്റര് വരെയാകാനും, ചില അവസരങ്ങളില് അത് 60 കിലോമീറ്റര് വരെ ഉയരാനും സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു.
