തിരുവനന്തപുരം: പുത്തൻതോപ്പിൽ ഓട്ടോയും സൂപ്പർ ബൈക്കും കൂട്ടിയിടിച്ച് യുവാവ് മരിച്ചു. മരിയനാട് ആറാട്ടുമുക്ക് സ്വദേശി ഷോൺ (30) ആണ് മരിച്ചത്. അപകടത്തിൽ ഓട്ടോ ഡ്രൈവർക്ക് ഗുരുതരമായി പരിക്കേറ്റു.
പുലർച്ചെ 4.30ഓടെ തീരദേശ പാതയിലെ പുത്തൻതോപ്പ് അണക്കപ്പിള്ള ജംഗ്ഷനിലായിരുന്നു അപകടം. തുമ്പ ഭാഗത്തേക്ക് പോകുകയായിരുന്ന ബൈക്കും പെരുമാതുറ ഭാഗത്തേക്ക് പോകുകയായിരുന്ന ഓട്ടോയുമാണ് കൂട്ടിയിടിച്ചത്.
അപകടത്തിൽ ഓട്ടോ ഡ്രൈവറായ ആക്കുളം തുറുവിക്കൽ സ്വദേശി ഷാജുകുമാറിന് ഗുരുതരമായി പരിക്കേറ്റിട്ടുണ്ട്. സംഭവത്തിന് പിന്നാലെ നാട്ടുകാരും പൊലീസും ചേർന്ന് ഇരുവരെയും തിരുവനന്തപുരം മെഡിക്കൽ കോളേജ് ആശുപത്രിയിലെത്തിച്ചിരുന്നു. എന്നാൽ ആശുപത്രിയിൽ എത്തിച്ചപ്പോഴേക്കും ഷോൺ മരിച്ചിരുന്നു. കഠിനംകുളം പൊലീസ് മേൽനടപടികൾ സ്വീകരിച്ചു.
