നായയെ ഓറഞ്ചും കറുപ്പും ചായം പൂശി കടുവയെ പോലെയാക്കിയതിനെതിരെ പ്രതിഷേധവുമായി മലേഷ്യയിലെ മൃഗസ്നേഹികള്. മലേഷ്യന് അനിമല് അസോസിയേഷന് നായയുടെ ചിത്രങ്ങള് സോഷ്യല്മീഡിയയില് പങ്കുവെച്ചു. നായയെ വരച്ചതിന് ഉത്തരവാദികളായവരെ കണ്ടെത്തി അറസ്റ്റ് ചെയ്യണമെന്നാണ് ഇവരുടെ ആവശ്യം. പോസ്റ്റ് മൃഗസ്നേഹികള് ഏറ്റെടുത്തതോടെ സംഭവം വളരെ വേഗത്തില് ജനശ്രദ്ധനേടി.
മൃഗങ്ങളുടെ രോമങ്ങളില് ചായം പൂശുന്നത് അവയുടെ ആരോഗ്യത്തിന് ഏറെ ഹാനികരമാകും എന്നതിനാല് ഇത്തരം പ്രവണതകള് മുന്പ് തന്നെ ഒട്ടേറെ വിമര്ശനങ്ങള്ക്ക് വഴിവെച്ചിരുന്നു. പ്രതികളെ കുറിച്ച് വിവരം നല്കുന്നവര്ക്ക് ഇവര് അവാര്ഡും പ്രഖ്യാപിച്ചിട്ടുണ്ട്.
നായയുടെ ദേഹത്ത് ചായംപൂശിയവരെ എത്രയും വേഗം കണ്ടുപിടിക്കണമെന്നും ഉചിതമായ ശിക്ഷ നല്കണമെന്നും മൃഗസ്നേഹികള് സോഷ്യല്മീഡിയയില് പോസ്റ്റ് ചെയ്ത കുറിപ്പില് പറയുന്നു. 3000ത്തില് അധികം പേര് പോസ്റ്റ് ഷെയര് ചെയ്തു. ആയിരത്തിനടുത്ത് ആളുകള് പോസ്റ്റിന് താഴെ അഭിപ്രായങ്ങള് അറിയിച്ചു. ഭൂരിഭാഗം പേരും നായയുടെ ദേഹത്ത് പെയിന്റിച്ച പ്രവൃത്തിക്കെതിരെ കടുത്ത നടപടി വേണമെന്നാണ് അറിയിച്ചത്. എന്നാല് ചിലര് ഇതിനെ മിനി ടൈഗര് എന്നാണ് വിശേഷിപ്പിച്ചത്. ഇതിനെ വെറും തമാശയായി കാണാന് കഴിയില്ല, മൃഗങ്ങള്ക്ക് നേരെയുള്ള പീഡനമെന്നാണ് മറ്റൊരാളുടെ പ്രതികരണം.
അതേസമയം മൃഗങ്ങള്ക്ക് നേരെയുള്ള ഇത്തരം പ്രവൃത്തി ഇതാദ്യമായല്ല. കഴിഞ്ഞ വര്ഷം കര്ണാടകയിലെ ഒരു കര്ഷകന് തന്റെ നായയെ ഇത്തരത്തില് പെയിന്റ് ചെയ്തിരുന്നു. കൃഷി നശിപ്പിക്കാനെത്തുന്ന കുരങ്ങുകളെ വിരട്ടി ഓടിക്കുന്നതിന് വേണ്ടിയായിരുന്നു അയാള് നായയെ കടുവയുടെ രൂപത്തിലാക്കിയത്.
കൃഷിയടത്തിന്റെ പലയിടങ്ങളിലായി കടുവയുടെ രൂപത്തിലുള്ള പാവ മാറ്റി വച്ചു നോക്കി. ആ പ്രദേശത്തേക്ക് കുരങ്ങന്മാര് വന്നില്ല. എന്നാല് ഇത് എപ്പോഴും പ്രാവര്ത്തികമാവില്ലെന്ന് തിരിച്ചറിഞ്ഞതോടെ കര്ഷകന് തന്റെ വളര്ത്തുനായക്ക് കടുവയുടെ നിറം കൊടുക്കുകയായിരുന്നു. ഇതിനെതിരെയും മൃഗസ്നേഹികള് രംഗത്തെത്തിയിരുന്നു.
Comments