റായ്പൂർ : ഛത്തീസ്ഗഡിൽ ജന്മാഷ്ടമി ദിനത്തിൽ ഉപവസിച്ച വിദ്യാർത്ഥികളെ മർദ്ദിച്ച അദ്ധ്യാപകനെ സസ്പെൻഡ് ചെയ്തു. കൊണ്ടഗാവ് ഗിരോളയിലെ സർക്കാർ സ്കൂളിലെ അദ്ധ്യാപകനായ ചരൻ മർക്കമിനെയാണ് സസ്പെൻഡ് ചെയ്തത്. ഗ്രാമവാസികളുടെ പരാതിയിലാണ് നടപടി.
ഏഴ്, എട്ട് ക്ലാസുകളിലെ വിദ്യാർത്ഥികൾക്കാണ് മർദ്ദനമേറ്റത്. രാവിലെ ക്ലാസിൽ എത്തിയ മർക്കം ഉപവസിച്ച കുട്ടികളോട് കൈ ഉയർത്താൻ ആവശ്യപ്പെടുകയായിരുന്നു. കൈ ഉയർത്തിയ കുട്ടികളെയായിരുന്നു മർദ്ദിച്ചത്.
രക്ഷിതാക്കൾ സ്കൂളിൽ എത്തി ചോദ്യം ചെയ്തപ്പോഴാണ് വിവരം മറ്റ് അദ്ധ്യാപകർ അറിഞ്ഞത്. സംഭവത്തിൽ സ്കൂൾ അധികൃതർ പ്രാഥമിക അന്വേഷണം നടത്തിയിരുന്നു. ഇതിൽ അദ്ധ്യാപകൻ കുറ്റക്കാരനാണെന്ന് കണ്ടെത്തിയതിനെ തുടർന്നായിരുന്നു നടപടി.
മതസ്പർദ്ധ വളർത്താനും, വിഭാഗീയതയുണ്ടാക്കാനും ശ്രമിച്ചതിനാണ് മർക്കമിനെ സസ്പെൻഡ് ചെയ്ത. അതേസമയം സംഭവത്തിൽ അദ്ധ്യാപകനെതിരെ കേസ് എടുത്തിട്ടില്ല. ഉടൻ ഇയാൾക്കെതിരെ നിയമ നടപടിയുണ്ടാകുമെന്നാണ് റിപ്പോർട്ട്.
