പിതോറാഗഢ്: ഇന്ത്യയുടെ ഒരിഞ്ച് ഭൂമിയെങ്കിലും കൈയ്യേറിയാൽ രാജ്യം ഉചിതമായ മറുപടി നൽകുമെന്ന് കേന്ദ്ര പ്രതിരോധമന്ത്രി രാജ്നാഥ് സിംഗ്. ഉത്തരാഖണ്ഡിൽ ഷഹീദ് സമ്മാൻ യാത്രയുടെ രണ്ടാം പാദഉദ്ഘാടനത്തിന് എത്തിയതായിരുന്നു രാജ്നാഥ് സിംഗ്.
അയൽക്കാരുമായി ഇന്ത്യ നല്ല ബന്ധമാണ് ആഗ്രഹിക്കുന്നത്. ഒരിക്കലും ഭാരതം ഒരു രാജ്യത്തെയും അങ്ങോട്ട് ആക്രമിച്ചിട്ടില്ല. ആരുടെയും ഭൂമി കൈവശപ്പെടുത്താനും പോയിട്ടില്ല. അയൽക്കാരുമായി നല്ല ബന്ധം പുലർത്തുകയെന്നത് ഇവിടുത്തെ സംസ്കാരമാണ്. പക്ഷെ ചിലർ അത് മനസിലാക്കുന്നില്ല. അത് അവരുടെ പ്രകൃത്യായുളള സ്വഭാവമാണോ അതോ ശീലമാണോയെന്ന് അറിയില്ല. രാജ്നാഥ് സിംഗ് പറഞ്ഞു.
തീവ്രവാദ പ്രവർത്തനങ്ങളിലൂടെ ഇന്ത്യയെ അസ്ഥിരപ്പെടുത്താനാണ് പാകിസ്താൻ ശ്രമിച്ചുകൊണ്ടിരുന്നത്. അതിന് അവർക്ക് ഉചിതമായ മറുപടി നൽകിയിട്ടുണ്ട്. പരിധി ലംഘിച്ചാൽ അവരുടെ അതിർത്തിയിലെത്തി സർജിക്കൽ സ്ട്രൈക്കും വ്യോമാക്രമണവും നടത്താനും മടിക്കില്ലെന്ന് കൃത്യമായ സന്ദേശമാണ് നൽകിയിരിക്കുന്നതെന്ന് രാജ്നാഥ് സിംഗ് പറഞ്ഞു.
നമുക്ക് മറ്റൊരു അയൽക്കാർ കൂടിയുണ്ടെന്ന് ചൈനയുടെ പേര് പറയാതെ പരാമർശിച്ചാണ് ഭൂമി കൈയ്യേറിയാൽ ഉചിതമായ മറുപടി നൽകുമെന്ന് രാജ്നാഥ് സിംഗ് വ്യക്തമാക്കിയത്.
Comments