കൊളംബോ : ശ്രീലങ്കയിൽ തുടരുന്ന പാക് ക്രിക്കറ്റ് താരങ്ങളുടെ സുരക്ഷ വർദ്ധിപ്പിച്ച് ഭരണകൂടം. പാകിസ്താനിൽ മതനിന്ദ ആരോപിച്ച് ശ്രീലങ്കൻ യുവാവിനെ മതമൗലികവാദികൾ കൊന്ന് കത്തിച്ച സംഭവത്തിൽ പ്രതിഷേധം കടുപ്പിക്കുന്ന സാഹചര്യത്തിലാണ് നടപടി. സംഭവത്തിൽ ശക്തമായ നടപടി സ്വീകരിക്കണമെന്ന് ആവശ്യപ്പെട്ട് കൊളംബോയിലെ പാക് ഹൈക്കമ്മീഷനു മുൻപിലുൾപ്പെടെ ശക്തമായ പ്രതിഷേധം തുടരുകയാണ്.
ലങ്കൻ പ്രീമിയർ ലീഗിൽ കളിക്കാനായി എത്തിയ പാക് താരങ്ങളാണ് നിലവിൽ ശ്രീലങ്കയിൽ ഉള്ളത്. പാക് താരങ്ങളായ മുഹമ്മദ് ഹഫീസ്, വഹാബ് റിയാസ്, ഷൊഐബ് മാലിക്, മുഹമ്മദ് ഉമർ, ഷൊഐബ് മഖ്സൂദ്, ഉസ്മാൻ ഷിൻവാരി, അഹമ്മദ് ഷഹ്സാദ്, അൻവർ അലി, മുഹമ്മദ് ഇർഫാൻ എന്നിവരാണ് ലങ്കൻ പ്രീമിയർ ലീഗിൽ കളിക്കാനായി ശ്രീലങ്കയിൽ തുടരുന്നത്. മത്സര ശേഷം ഇവരെ വേഗം പാകിസ്താനിലേക്ക് മടക്കി അയക്കാനാണ് അധികൃതരുടെ തീരുമാനം. ഞായറാഴ്ച ആരംഭിച്ച മത്സരം ഡിസംബർ 23 നാണ് അവസാനിക്കുക.
പാകിസ്താനിലെ വസ്ത്രഫാക്ടറിയിൽ ജനറൽ മാനേജർ ആയി ജോലി ചെയ്തുവരികയായിരുന്ന പ്രിയന്ത കുമാര ദിയാവാദനയെയാണ് മതനിന്ദ ആരോപിച്ച് മതമൗലികവാദികൾ ക്രൂരമായി കൊലപ്പെടുത്തിയത്. മർദ്ദിച്ച് കൊലപ്പെടുത്തിയ ശേഷം അക്രമികൾ അദ്ദേഹത്തെ ആളുകൾക്ക് മുൻപിലിട്ട് കത്തിക്കുകയായിരുന്നു.
