ജയ്പൂര്‍: രാജസ്ഥാനിലെ അശോക് ഗെലോട്ട് സര്‍ക്കാര്‍ 200 എംഎല്‍എമാര്‍ക്കും ഐഫോണ്‍ 13 സമ്മാനിച്ചതിന് തൊട്ടുപിന്നാലെ ബിജെപി എംഎല്‍എമാര്‍ സമ്മാനം നിരസിച്ചു. ഉയര്‍ന്ന വിലയുള്ള ഫോണുകള്‍ സംസ്ഥാന ഖജനാവിന് സാമ്പത്തിക ബാധ്യതയുണ്ടാക്കുമെന്നതിനാല്‍ സമ്മാനം തിരികെ നല്‍കാന്‍ ബിജെപി തീരുമാനിച്ചു. ഒരു ഐഫോണ്‍ 13-ന്റെ വില ഏകദേശം 70000 രൂപയ്‌ക്ക് മുകളിലാണ്. പാര്‍ട്ടി എംഎല്‍എമാര്‍ ഐഫോണുകള്‍ തിരികെ നല്‍കുമെന്ന് രാജസ്ഥാന്‍ ബിജെപി അധ്യക്ഷന്‍ സതീഷ് പൂനിയ ഉറപ്പാക്കി.
കഴിഞ്ഞ ദിവസം രാജസ്ഥാന്‍ സര്‍ക്കാര്‍ 2022-23 ബജറ്റ് അവതരിപ്പിച്ചതിന് തൊട്ടുപിന്നാലെ എല്ലാ എംഎല്‍എമാര്‍ക്കും ഹാളില്‍ നിന്നു പുറത്തുകടക്കുന്ന സമയത്ത് ഐഫോണ്‍ 13 ഉള്ള ബ്രീഫ്കേസ് സമ്മാനിക്കുകയായിരുന്നു. എംഎല്‍എമാരെ ഹൈടെക്ക് ആക്കാനാണ് ഐഫോണ്‍ സമ്മാനിച്ചതെന്ന് ഭരണകക്ഷി എംഎല്‍എ പറഞ്ഞു.
അതെ സമയം സാമ്പത്തിക പ്രതിസന്ധി നേരിടുന്ന സമയത്ത് എംഎല്‍എമാരെ ഐഫോണ്‍ നല്‍കി ഹൈടെക് ആക്കുന്നതിനോട് യോജിപ്പില്ലെന്നും ഇത്രയും വലിയ തുക ഫോണുകള്‍ക്കായി ചെലവഴിക്കുന്നത് ന്യായീകരിക്കാനാവില്ലെന്നും ബിജെപി എംഎല്‍എ വാസുദേവ് ദേവ്നാനി പറഞ്ഞു. .
ബജറ്റിനു ശേഷം അഞ്ചുലക്ഷം കോടിയിലധികം രൂപ കടത്തിലായിരിക്കുമ്പോള്‍ ഇത്രയും വിലകൂടിയ ഫോണ്‍ വാങ്ങുന്നത് എത്രത്തോളം ന്യായമാണെന്ന് ദേവ്നാനി ചോദിച്ചു. 200 അംഗ രാജസ്ഥാന്‍ നിയമസഭയില്‍ ബിജെപിക്ക് 71 എംഎല്‍എമാരാണുള്ളത്. ഈ എംഎല്‍എമാര്‍ ഐഫോണ്‍ തിരിച്ചുനല്‍കും.
