മുംബൈ : ദാവൂദ് ഇബ്രാഹിമുമായി ബന്ധപ്പെട്ട കള്ളപ്പണ കേസിൽ അറസ്റ്റിലായ മന്ത്രി നവാബ് മാലിക്കിനെതിരെ പ്രതിഷേധം കടുപ്പിച്ച് ബിജെപി. നഗരത്തിൽ പ്രതിഷേധ പ്രകടനം നടത്തിയ മുൻ മുഖ്യമന്ത്രി ദേവേന്ദ്ര ഫട്നാവിസിനെയും ബിജെപി പ്രവർത്തകരെയും പോലീസ് കസ്റ്റഡയിൽ എടുത്തു. മന്ത്രിയുടെ രാജി ആവശ്യപ്പെട്ട് ആസാദ് മൈതാനിൽ നിന്നാണ് ബിജെപി പ്രതിഷേധ പ്രകടനം ആരംഭിച്ചത്.
നിലവിൽ വിജിലൻസ് കസ്റ്റഡിയിൽ ഉള്ള നവാബ് മാലിക്ക് രാജിവെയ്ക്കണമെന്നാണ് ബിജെപിയുടെ ആവശ്യം. രാജിവയ്ക്കുന്നതുവരെ സമാന രീതിയിൽ ശക്തമായി പ്രതിഷേധിക്കുമെന്നും ബിജെപി മുന്നറിയിപ്പ് നൽകുന്നുണ്ട്. ആസാദ് മൈതാനിൽ നിന്നും ആരംഭിച്ച പ്രതിഷേധം മെട്രോ സിനിമ പരിസരത്തുവെച്ചാണ് പോലീസ് തടഞ്ഞത്. തുടർന്ന് ഫഡ്നാവിസ് ഉൾപ്പെടെയുള്ളവരെ കസ്റ്റഡിയിൽ എടുത്ത് യെല്ലോ ഗേറ്റ് പോലീസ് സ്റ്റേഷനിലേക്ക് കൊണ്ടുപോകുകയായിരുന്നു. ദേവേന്ദ്ര ഫഡ്നാവിസിന് പുറമേ ബിജെപി സംസ്ഥാന അദ്ധ്യക്ഷൻ ചന്ദ്രകാന്ത് പാട്ടീൽ, ആശിഷ് ഷെലാർ, മംഗൾ പ്രഭാത് ലോധ എന്നിവരാണ് അറസ്റ്റിലായത്.
അതേസമയം നിയമനടപടികൾ പൂർത്തിയാക്കിയ ശേഷം ഫഡ്നാവിസിനെയും ബിജെപി പ്രവർത്തകരെയും പോലീസ് വിട്ടയച്ചു. പ്രതിഷേധത്തിന്റെ പശ്ചാത്തലത്തിൽ നഗരത്തിൽ കൂടുതൽ പോലീസ് ഉദ്യോഗസ്ഥരെ വിന്യസിച്ചിട്ടുണ്ട്. കഴിഞ്ഞ മാസമാണ് നവാബ് മാലിക്ക് അറസ്റ്റിലായത്.
