ഇന്ത്യന് ക്രിക്കറ്റ് ടീമിലെ സീനിയര് താരമായ രവിചന്ദ്ര അശ്വിന് കൊറോണ സ്ഥിരീകരിച്ചു. ഇംഗ്ലണ്ടില് നടക്കുന്ന ടെസ്റ്റ് മത്സരത്തില് പങ്കെടുക്കാന് യാത്ര തിരിക്കുന്നതിന് മുന്നോടിയായി നടത്തിയ പരിശോധനയിലാണ് ഇന്ത്യന് ഓഫ് സ്പിന്നര്ക്ക് രോഗം സ്ഥിരീകരിച്ചത്. കൊറോണ സ്ഥിരീകരിച്ചതോടെ ഇംഗ്ലണ്ടിലേക്കുള്ള അശ്വിന്റെ യാത്ര മാറ്റി വെച്ചു. എന്നാല് ആശങ്കപ്പെടേണ്ട സാഹചര്യമില്ലെന്നും ടെസ്റ്റ് മത്സരത്തിന് മുന്നോടിയായി അശ്വിന് ടീമിനൊപ്പം ചേരാന് കഴിയുമെന്നും ബിസിസിഐ വ്യത്തങ്ങള് അറിയിച്ചു.
ജൂലൈ ഒന്നിനാണ് ഇന്ത്യ ഇംഗ്ലണ്ട് ടെസ്റ്റ് മത്സരം. കഴിഞ്ഞ വര്ഷം നടന്ന അഞ്ച് മത്സരങ്ങളുടെ ടെസ്റ്റ് പരമ്പരയില് കൊറോണ മൂലം മാറ്റിവെച്ച മത്സരമാണ് നടക്കുന്നത്. ഇതിന് പുറമേ മൂന്ന് ഏകദിനങ്ങളും മൂന്ന് ടി20 മത്സരങ്ങളും ഇരു ടീമുകളും തമ്മില് കളിക്കും. പരമ്പരക്ക് മുന്നോടിയായി മറ്റു ഇന്ത്യന് ടീമംഗങ്ങള് ഇംഗ്ലണ്ടിലെത്തി പരിശീലനം ആരംഭിച്ചു.
നിലവില് ക്വാറന്റൈനില് കഴിയുന്ന താരത്തിന് എല്ലാ പ്രോട്ടോകോളും പാലിച്ച് ഈമാസം അവസാനത്തോടെ ടീമിനൊപ്പം ചേരാന് കഴിയുമെന്നാണ് പ്രതീക്ഷിക്കുന്നത്. അതേസമയം ടെസ്റ്റ് മത്സരത്തിന് മുന്നോടിയായി ലെസിസ്റ്റര്ഷെയറിനെതിരായ പരിശീലന മത്സരം അശ്വിന് നഷ്ടമാകും. ഈ മാസം 24 മുതല് 27വരെയാണ് ലെസിസ്റ്റര്ഷെയറിനെതിരെയായ ചതുര്ദിന പരിശീലന മത്സരം .
Comments