ചെന്നൈ: നടുറോഡിൽ സ്ഥാപിച്ചിരുന്ന സൈൻ ബോർഡ് മറിഞ്ഞ് വീണ് ഒരാൾ മരിച്ചു. രണ്ട് പേർക്ക് പരിക്കേറ്റിട്ടുണ്ട്. റോഡിലൂടെ സഞ്ചരിക്കുകയായിരുന്ന വാഹനങ്ങൾക്ക് മുകളിലേക്കായിരുന്നു സൈൻബോർഡ് വീണത്. ചെന്നൈയിലായിരുന്നു സംഭവം. ബൈക്ക് യാത്രികനാണ് മരിച്ചത്.
സൈൻബോർഡ് നിന്നിരുന്ന തൂണിലേക്ക് ഒരു ബസ് ഇടിച്ചതോടെ ബോർഡ് മറിഞ്ഞ് വീഴുകയായിരുന്നു. ചെന്നൈയിലെ കത്തിപാറയിലുള്ള ഫ്ളൈ ഓവറിലായിരുന്നു അപകടമുണ്ടായത്. ആലണ്ടൂർ മെട്രോ സ്റ്റേഷന് സമീപമാണ് ഈ ഫ്ളൈ ഓവർ സ്ഥിതി ചെയ്യുന്നത്.
പരിക്കേറ്റവരെ അടുത്തുള്ള ആശുപത്രിയിൽ പ്രവേശിപ്പിച്ചു. ഇവരുടെ ആരോഗ്യനില ഗുരുതരമാണെന്നാണ് വിവരം. അപകടത്തിന് പിന്നാലെ പാതയിൽ ഏറെ സമയം ഗതാഗതക്കുരുക്ക് അനുഭവപ്പെട്ടിരുന്നു.
