ന്യൂഡൽഹി: ഇൻഡിഗോ വിമാനത്തിൽ സാങ്കേതിക തകരാർ ശ്രദ്ധയിൽ പെട്ടതിനെ തുടർന്ന് ഡൽഹി വിമാനത്താവളത്തിൽ അടിയന്തിരമായി ഇറക്കി. ഡൽഹി-ഉദയ്പൂർ റൂട്ടിൽ സർവ്വീസ് നടത്തുന്ന ഇൻഡിഗോ എയർബസ് 6ഇ 6264 വിമാനത്തിലാണ് തകരാർ സംഭവിച്ചത്.
വിമാനത്തിന്റെ എഞ്ചിനിൽ ഉണ്ടായ പ്രകമ്പനം കാരണമാണ് അടിയന്തിരമായി ഇറക്കേണ്ടി വന്നതെന്ന് ഡിജിസിഎ അധികൃതർ വ്യക്തമാക്കി. വിമാനം സുരക്ഷിതമായി ഇറക്കിയതായും സംഭവത്തെക്കുറിച്ച് ഡിജിസിഎ വിശദമായ അന്വേഷണം നടത്തുമെന്നും ഉദ്യോഗസ്ഥർ അറിയിച്ചു.
സാങ്കേതിക തകരാർ മൂലം ഡൽഹി വിമാനത്താവളത്തിലേക്ക് വിമാനങ്ങൾ തിരിച്ചുവിടുന്നതും അടിയന്തിരമായി ഇറക്കുന്നതും തുടർ കഥയാണ്. രണ്ട് ദിവസത്തിനിടയിലെ രണ്ടാമത്തെ സംഭവമാണിത്. 89 യാത്രക്കാരുമായി ഡൽഹിയിലെ നാസിക്കിലേക്ക് പുറപ്പെട്ട സ്പൈസ് ജെറ്റ് വിമാനത്തിന്റെ ഓട്ടോപൈലറ്റ് സംവിധാനത്തിൽ തകരാർ കണ്ടെത്തിയതിനെ തുടർന്ന് ഇന്നലെ യാത്രക്കാരെ സുരക്ഷിതമായി തിരിച്ചിറക്കിയിരുന്നു.
